|
熱門:

2019年3月26日 即巿股評 港股直擊

【盤房來料】注意28000至28500仍有肥牛可劏

美股表現較為反覆,不過美債孳息曲線倒掛,確係嚇親唔少缸邊友,但自從2008年金融海嘯發生以後,全球以美國聯儲局為首嘅各地央行,均進行貨幣量化寬鬆政策,早已令美債孳息曲線,長期處於一個較為畸形嘅狀況,即使上周五孳息曲線再出現倒掛,亦未必能確切地預示美國甚至全球經濟轉差,上周五美股嘅跌勢,似乎市場有些少反應過敏,呢個時候反而缸邊友應更加冷靜,未必一定要全線撤退,只要具有一定避險意識就可以。

至於港股呢邊,以第一季初低位計算,累積反彈升幅其實甚為可觀,呢個時候藉美股回調,而A股升低三千水平進行整固,大條道理作更深度調整,而阿Man早喺上星期已作預警,再睇埋牛熊證街貨分布,喺牛證街貨逐步增加嘅情況下,大戶踩低一千幾百點鋸牛扒亦好合理。暫時見牛證街貨由28000點至28499點之間,已累積咗相等於超過四千張嘅期指,即使噚日裂口下跌,已將28500點樓上嘅牛貨KO,恒指喺失守10日線(29014點)及20日線(28896點)後,仍有機會再下試250日線(28180點),剛好跟50日線(28203點)所形成嘅黃金交叉亦喺28118點,估計喺28000至28200點將會有頗強支持。估計大市若殺到落28000邊,大部份嘅牛證街貨亦已KO得七七八八,當然要再睇呢兩三日,牛證街貨會否繼續退守至28000樓下及增加。

再睇埋噚日大市裂口低開後,即使下跌速度及壓力唔算嚴重,而今日恒指高開154點,曾升178點至28701點半日高位,但A股唔爭氣,令港股反彈升幅大大收窄,國指更倒跌。半日恒指報收28564點,升40點;國指則幾乎持平,報收11231點。

重磅藍籌股個別發展,大笨象(00005)及友邦(01299)微力彈,舜宇(02382)及申洲(02313)分別升2.4%及3.7%,後者更加係半日藍籌股升幅冠軍。其他重磅股如騰訊(00700)則跌0.7%,但股價仍守喺350元水平之上,又唔可以話好差。不過南非大股東玩分拆旗下業務,變相又減持騰訊,而肥央最近則再度開口撐騰訊,跟舊年三月時,大股東減持,肥央掃貨打對台嘅情景一模一樣,之後騰訊表現如何,希望今年唔好案件重演,否則有啲心寒。
上星期提過物管股仍值得中線睇好,今日唔少物管股創上市後新高,但礙於大市整體氣氛麻麻地,唔少物管股創新高後升勢回順,更甚者無以為繼倒跌。之前已叫大家物管股雖好都要候低吸納,有貨則設止賺位坐定定,暫時未宜加碼,亦未使太急離場。

麥狄文

(徐狄怡 ‧ 證監會持牌人‧ 大錦證券有限公司董事)

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。