熱門:

2019年2月12日 即巿股評 港股直擊

【盤房來料】貿易談判再展開 市場或轉觀望

美股隔晚個別發展,港股ADR偏軟,重返二萬八點之下,而港滙及人民幣滙價轉弱,以為港股今日難逃一跌,偏偏港股強到無朋友,再創近五個半月新高。恒指低開曾跌最多160點,低見27983點,其後A股造好帶動下,港股拗腰倒升,突破2月1日高位,最多升75點,見28219點,創自去年8月30日以來新高。恒指中午報收28188點,升44點;國指則升46點,報收11063點。

之前阿Man已講過,騰訊(00700)升到350元呢啲水平,升勢將會放緩,喺呢啲水平要抖抖,結果係騰訊近日成交依舊暢旺,但股價卻有啲停滯不前,半日報352元無起跌。即使騰訊似唔上唔落,亦咪旨意其股價會忽然插水,預期喺現水平整固一下,始終亦會隨大市一齊挑戰250日線(約361元)。

今日終於輪到港交所(00388)接力做好,今日喺大成交之下股價半日抽升逾3%,皆因有大行報告唱好,被大摩上調目標價至340元。至於另一表現最好嘅藍籌股,就係吉利(00175),1月銷量創新高,半日急升5.5%。

醫藥股今日見異動,國務院常務會議上,提出加強癌症、罕見底等大疾病防治,下月起首批21個罕見病藥品及4個原料藥。之前阿Man提到,主力生化藥及自研藥品嘅龍頭醫藥股,仍然係具錢途嘅股份,尤其兩藍籌籠頭石藥(01093)及中生製藥(01177),半日分別升5.3%及4.9%。而藥明生物(02269)跟罕見代謝藥廠合作,股價升亦2.7%。5G概念股繼續熱炒,呢個板塊同樣係今年重點,亦係值得逢回吐吸納。

雖然環球經濟情況仍存好多不明朗因素,包括中美貿易關係、米字旗國脫歐及人民幣再度轉弱,但中港股市似乎唔多理會呢啲不穩定因素,反映市底已轉強。值得留意係外資已連續9個交易日淨買入A股,而上個月整整一個月,北上資金透過互聯互通機制已淨買入607億元人仔A股,創下互聯互通開通以嚟單月最高紀錄。喺外資入場掃貨下,中港股市反彈或可持續,即使未能確認兩地股市正式轉勢,擺脫熊市,但短線仍未宜看淡,呢一點阿Man喺呢一個月一直強調。而恒指牛熊證街貨最近重貨區喺28200至28299點,睇嚟呢一區嘅熊證好快會壯烈犧牲。

指數方面喺27800點有不俗支持,上面阻力略上移至250日線,喺28400點之前唔係咁易突破。睇番港股近日氣勢如虹,而A股農曆年復市保持強勢,滬綜指數昨日升逾1%之後,今日再錄得進賬。而中美經貿高級別磋商將於本周四及五進行,預期呢兩日觀望氣氛將轉濃,而恒指要挑戰250日線(約28368),仍需好消息帶動,談判消息將左右市場情緒。

麥狄文

(徐狄怡 ‧ 證監會持牌人‧ 大錦證券有限公司董事)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。