熱門:

2019年1月23日 即巿股評 港股直擊

【盤房來料】大市於二萬七水平爭持整固

隔晚美股跌到一仆一碌,放完周一假期返嚟,又被幾個利淡消息夾擊,除咗聯邦政府持續停擺之外,更傳出美國要引渡華為公主孟晩舟,當然中方唔多likely。傳出呢個消息後,更有消息指白宮將取消月底跟中方官員嘅會談,雖然事後已被白宮否認有關傳聞,但當市場眼見美國又再針對華為,實在係對中美關係一種打擊。

美股三大指數隔晚顯著下跌,港股噚日已偷步跌定先,收市險守二萬七關,雖然隔晚夜期跟ADR都隨美股碌咗落去26800水平,但今早表現又唔係太差,低開後見支持,竟反覆回升。恒指今早低開125點,報26879點為半日低位,未到10日線(26829點)已有支持,其後反覆向上,半日最多升125點,見27131點半日高位。中午恒指報收27021點,升16點;國指則報10648點,升34點。美股跌成咁,港股仲守住二萬七都算係咁,預期喺26800點至27000點淨持整固,總之一日26600呢個位未真正失手,港股都唔死得。

重磅股話咗係輪流頂住個市,今日輪到電訊股發力,尤其係5G概念最強勢,成份股中嘅中移動(00941)及中聯通(00762)分別升1.2%及3.2%,後者阿Man上周已表示可追落後,今日半場更成為係升幅最大藍籌股。至於其他相關概念股,抖咗兩日氣今日又發力,中國鐵塔(00788)再創新高,當然之前阿Man推介嘅中通服(00552)亦唔執輸,半日升逾4%,即管睇下今次有冇本事突破前高位,即7.6水平。

5G概念股威威,其他重磅股表現相對失色,騰訊(00700)見過340元後,暫時搵唔到一個理由再推股價,暫時喺340元之前整固一下。其他重磅股友邦(01299)、平保(02318)輕微下跌,內銀股則企穩。重磅股中以石油股表現特別差,事關油價又腳軟,話咗石油股呢期都係有波幅,冇升幅,都唔使對石油股有任何幻想。

又講一講細價股,噚日已有大行出報告,批死股仔無運行,好老實係人都知阿媽係女人,唔使大行出報告,早知股仔繼續無運行。自謎網50搞咗單粉塵爆炸事件後,市場對細價股何止怕怕,基本上已心灰意冷,再加上監管機構進一步對細價股嘅企業活動進行規管,細價股嘅生存空間持被扼殺。上周佳源(02768)暴瀉後,翌日即上周五作報復式反彈,噚日又回復弱勢插水逾兩成後停牌,就算公司公布大股東押股後,持股量未有大變動,但缸邊友聽到押股呢兩個字都怕怕。阿Man上周已叫咗對於呢啲股最好靠邊站,查實係怕入場博反彈,無啦啦中途拉閘。佳源噚日就係炒炒吓高掛免戰牌,缸邊友最擔心係一復牌又嚟人踩人。好似自去年10月起停牌嘅興業太陽能(00750),控股權擬易手至山東省國資委,變身「國企」好唔好事見人見智,但股價停牌幾個月,復牌定惹股東套現沽壓出現,人踩人股價自然難逃一瀉。

麥狄文

(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads