熱門:

2019年1月21日 即巿股評 港股直擊

【盤房來料】中美貿易談判 中國採拖字訣政策

上周五美股繼續做好,皆因中美貿易談判似乎大有進展,中國提議一項為期六年嘅計劃,期間將逐步增加美國進口貨品超過一萬億美元,務求令中美貿易逆差逐步下降,至2024年達零水平。表面睇呢個條件應能滿足「侵侵」一直強調,中美貿之間失衡,貿易逆差過大嘅問題,但說穿了不過又係一個拖字訣。六年之期係假設侵侵可以連任一屆總統,中國應對貿易戰嘅核心策略,不過就係buy time。美國對中國商品需求龐大,要完全消除貿易逆差,阿Man認為係不可能的任務;而中方對於美國要求推動中國結構性改革,中方隻字不題;而雙方喺智慧產權問題上亦毫無進展。至於有關美國考慮取消向中國進口貨徵收關稅嘅報道,「侵侵」形容報道不盡不失,但似乎市場都唔多理會。

雖然明知中國係玩緊乜,但市場明係要當負面因素睇佢唔倒,只係將所謂嘅利好消息無限放大,無非都係要繼續挾爆淡倉。加上內地公布GDP數據合符預期,一度帶動港股今早曾高見三個半月高位。恒指高開43點見27134點,其後曾倒跌6點,低見27084點半日低位;其後GDP公布符合預期,港股再回復升勢,最多升232點,見三個半月高位27323點。恒指中午報收27181點;升91點;國指升63點,報收10700點。港股由二萬五水平升至二萬七水平,升下升下令到唔少淡友都開始懷疑人生,不過阿Man仍然好清晰,家陣港股仍處於熊市,除非大市能收復去年1月見頂後,2月首次見嘅低位,即係29000水平,否則目前港股只係熊市中嘅反彈。

重磅股普遍向上,騰訊(00700)升至344.4元超過4個半月高位,半日報收339.6元,好老實騰訊已到晒阿Man目標價,有貨都食糊套現。友邦(01299)逆市跌1.5%,暫時70元阻力過唔倒,睇嚟又係時間要抖抖。平保(02318)一如預期接力追落後,順利向住75元目標進發,家下將個止賺位調高至71.5元,未轉勢當然繼續持有。大市方面,大戶挾淡倉未見想停手,睇埋牛熊證街貨比例仍然失衡,目前熊證最重街貨區喺27500至27599,斷估呢堆熊證犧牲機會甚大。

西王特鋼低吸機會

內地GDP按年增長6.6%,係呢28年以嚟最低,暫時跟預期約,不過投資者一般已預期今年內地經濟長繼續放緩,能夠保住6%已經唔錯。為咗保持經濟增長,固定投資增速要加快,今年當然繼續狂谷基建,之前阿Man已表示基建鐵路股係逢低吸納對象。退而求其次,喺鐵路發展仍為今年中央重要政策方向,即使鋼材價格短期或見波動,但鋼軌材料產品受惠國策,前景值得看好。剛公布業績嘅西王特鋼(01266),年息率達雙位數甚為吸引,今日股價雖見下跌,反而係低吸機會,皆因再大幅下跌空間有限,值博率相對較高。公司預期去年度純利介乎9至10億元(人民幣。下同),純利按年保持穩定長。公司純利上升,主要在供應端方面,因國家環保檢查力增大,令部份不達標生產商停產,導致整體鋼鐵供應下降,利潤空間因此增長。

西王特鋼亦於中期報告指出,將全力推進與中科院合作研發之鋼軌項目發展,把高強度、高韌性及高耐用性鋼軌產品引入市場,從而大幅提升特鋼業務比例。該生產線預計每年能生產70萬噸鋼軌、15萬噸鐵路軸坯及15萬噸型鋼,預計項目第一期(30萬噸鋼軌及15萬噸鐵路軸坯)將於2019年中期竣工,第二期將於2020年竣工。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。