當噚日港股回吐幾百點，全城又轉軚睇淡之際，阿Man已強調港股係傾向行上落市，只要守得住幾條移動平均線，再收復100日線企穩，恒指今個月仍然有條件挑戰二萬七。話口未完，今日港股唔單止裂口高開，更愈升愈有，一度升至26800水平。恒指早段高開逾200點，成功收復100日線(26397點)，其後升幅雖略為收窄至129點，見26427點半日低位，喺內地股市做好下，升幅再度擴大，盤中最多升540點，見半日高位26838點。中午恒指報收26746點，升448點；國指則升185點，報10478點。
騰訊(00700)噚日守得住320元收市，走勢又唔係咁弱，今日好友要反攻，當然要搵騰訊幫手帶領，半日騰訊升2.1%，盤中曾高見330.8元，中午報收328.6元，中晒之前阿Man預測目標價射程範圍，今次目標價高位係335元，即管睇睇騰訊仲有冇本事更上一層樓。除咗騰訊之外，夠晒噸位嘅友邦(01299)跟中移動(00941)齊齊升逾2%，其他重磅股亦升逾1%。
今日係米字旗國就脫歐協議投票嘅日子，連文翠珊自己都打定輸數，暗示米字旗國最終或留番喺歐盟，而國會一早已表示唔會通過呢份脫歐協議，市場早已有心理準備點樣面對，米字旗國一旦硬脫歐、無協議脫歐，甚至唔脫歐幾個可能，暫時英鎊喺亞洲時段回升，睇嚟市場對脫歐消息早已消化。不過阿Man都要提一提，始終米字旗國有關脫歐問題有乜依郁，定心對整個歐洲市場，甚至環球股滙市場帶嚟震盪。
內地經濟數據表現強差人意，市場憧憬阿爺再度出手撐經濟，第一個諗起要扶持嘅產業，當然係推動基建。基建股及鐵路股做好，呢個板塊阿Man由舊年下半年開始已睇好，並表示基建鐵路股將持續跑贏大市，今日輸到中鐵建(01186)創52周高位。除咗基建鐵路股之外，水泥股及重型設備股亦有資金追捧，但呢幾瓣股份之中，阿Man都係鍾情基建鐵路股。
新股跟半新股呢期有番啲炒作，之前阿Man建議認購嘅永升生活(01995)今日創新高，半日升近2%，同樣係物管股嘅新城悅(01755)及佳兆業物業(02168)亦有資金流入，不過除咗佳兆業物業，永升跟新城悅創新高後見回吐。另一熱炒新股優品360(02360)同樣創新高後回吐。錯過咗優品360呢一包零食，不如嘆杯咖啡睇番隻捷榮(02119)，公司剛剛發盈喜，集團喺零售市道每況愈下之際，盈利表現維持可觀增長，當然跟管理層表現出象有關，集團嘅內地餐飲策劃服務部分銷售特別出色，預期集團呢幾年都可以keep住有雙位數增長。技術走勢方面，股價早於盈喜公布前已預早升穿下降軌，今日股價裂口高開，暫時企穩喺1.2元樓上，急升後整固一下好常，守住1.2元樓上，股價可望進一步向1.4元出發。
麥狄文
(徐狄怡‧證監會持牌人)
