中美貿易談判太好傾，雙方今日展開多一日非既定會面，「侵侵」又話「與中國的磋商進行得非常順利。」，市場憧憬中美雙方將和氣收場，美股連升三個交易日。貿易談判有好消息，而內地繼上周五宣布降準後，發改委又計劃今年推出新措施撐經濟，帶動中港兩地股市愈升愈有，港股半日急升逾600點。
恒指裂口高開逾300點，開市已一口氣收復50日線(25951點)及二萬六大關，雖然早段曾略為收窄升幅，回落至26192點半日低位，但內地股市愈升愈有，港股當然唔執輸，升幅再度擴大至664點，半日高位見過26540點，進一步收復100日線。半日恒指報收26512點，升636點；國指則升264點，報收10397點。
重磅股終於有啲睇頭，早兩日阿Man講咗，只要騰訊(00700)能企穩喺310元，大有條件再向320至325元出發，半日升2.5%。QQ若然能夠突破325元，下一目標為335元，有貨喺手將止賺或止蝕位定喺315元，跌穿咗就三十六着，走為上着。其他重磅股亦全線上漲，友邦(01299)半日升3%，連同大笨象(00005)升1.8%，呢三大巨頭已為恒指貢獻超過三分一升幅。
國家發改委副主任寧吉喆表示，今年將訂定及推出促進汽車等熱點產品消費措施，呢一句話救番近日死剩半條命嘅汽車股，整個板塊全線反彈，吉利(00175)半日更升逾8%，成為藍籌股升幅之冠。而長汽(02333)半日升12%，係表現最勁國指成份股，其他汽車股錄得3%至5%升幅不等。不過阿Man打死都唔會高追汽車股，內地鐵定要開放汽車市場，進口車稅大減，將大大削弱一向以價平取勝嘅內地汽車製造商，冇咗呢個優勢，無論土產品牌或合營品牌，內地汽車製造業都係瓜多過菜。
至於另一受惠發改委政策嘅家電股，一樣炒到出煙，當中估值較便宜嘅海信家電(00921)半日急升近一成，走勢突破升勢有餘未盡。其他內地家電股閒閒地升3%以上。市場憧憬中美貿易談判一旦搞掂，將會刺激埋石油需求，油價急升逾2%，三桶油當然高走。一日中美雙方未完全傾掂數，貿易戰威脅未除，環球經濟仍然有走下坡風險，石油股都係嗰句，高追通常無乜好結果。反而油價今年有機會持續低迷，而航空股料可受惠，加上人民幣匯價回穩，寧願吼三隻中資航都唔吼三桶油。
麥狄文
(徐狄怡‧證監會持牌人)
