熱門:

2018年12月19日 即巿股評 港股直擊

【盤房來料】提早收爐等放聖誕假

美股隔晚表現反覆,早段道指曾反彈逾300點,其後一度倒跌,最終收市升幅收窄至82點,標普更幾乎無進賬,港股隔晚表現反覆,今日半場表現同樣無神無氣,喺50日線(25907點)附近爭持。恒指高開46點,開市不久曾倒跌30點,見過25784點半日低位,其後回升111點,至25926點半日高位。中午恒指報收25855點,升41點;國指跌19點,半日報收10211點。成交額維持低迷,半日只有276億元,下周一只有半日市,跟住到聖誕假期,缸邊友無心戀戰好正常。

美國聯儲局連續兩晚議息,侵侵已四度喺社交平台出帖文,希望聯儲局高抬貴手唔加息,不過市場普遍相信,今個月聯儲局點都會加多次息。反而會後議息聲明先係重點,喺市場開始預期美國未來經濟開始放緩,甚至走下坡嘅情況下,聯儲局應該放鴿。不過歐洲央行講到明開始閂水喉,貨幣政策由寬鬆變收緊,市場少咗錢係事實,缺水情況下,環球魚缸好難有運行。

港股半日表現淡靜,金融表現較好,友邦(01299)升逾1%,中資銀行股亦有進帳,大笨象(00005)升0.4%。不過重磅股升幅好有限,重中之中嘅騰訊(00700)半日無起跌,能夠守住300元已經算唔錯。石油股全線仆直,美國跟俄羅斯產量創紀錄新高,油價急挫至今年8月以嚟新低,紐約期油跌穿每桶50美元。之前阿Man苦女婆心叫咪多手接飛刀,油價弱勢已成,石油股只有波幅,唔會有升幅,家陣油價未知幾時跌停,石油股仍然未宜沾手。

雖然中證監原則上已同意明年准許北水買入同股不同權股份(W股),但係幾時落實執行仍遙遙無期,遠水不能救近火,新經濟股無論係咪W股,全部跌到一仆一碌,美團(03690)、美圖(01357)、平安好醫生(01833)低處未算低,半日再創收市新低,而瑞聲(02018)被大行降低投資評級,半日股價跌3.5%,小米(01810)亦難逃一跌,半日跌0.6%。被國策折磨至體無完膚嘅醫藥股今日再插水,又係另一個不能觸碰嘅板塊,醫藥股半日再插水,跌幅普遍下跌超過2%。

咁嘅市況真係無乜好搞,指數窄幅波動,做好做淡都無肉食,當炒板塊風光不再,家陣只有向下炒。不如疊埋心水等放假,提早收爐諗下假期有乜節目好過。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。