雖然上周五美股跌到一仆一碌，但港股又死唔去，恒指高開83點，曾升至26186點半日高位，可惜成交太奀無水入場，其後倒跌92點，考驗二萬六水平，見過26002點半日低位。二萬六水平有不俗支持，其後靠穩，中午恒指報收26102點，升7點；國指則報收10386點，升27點。
由於本周稍後時間到中央經濟工作會議召開，加上聯儲局議息，港股無乜方向亦情有可願，難得守住二萬六點，未有跟隨美股顯著下跌，喺現平整固一下，總好過又再失50日線(25921點)再向下發展。重磅藍籌股都係咁上下，升跌個別發展，表現呆滯。中國確認自下月1日起，暫停向美國進口汽車及零件，加徵額外25%關稅三個月，汽車股普遍下跌。面對進口汽車競爭，加上內地經濟放緩影響汽車銷量，內地汽車股短線都係瓜多過菜。
美滙指數仍高企97水平，令人民幣離岸價偏軟，內地航空股逆市下跌，三內地航空股半日跌逾1%。不過油價弱勢已成，只要人民幣回穩，航空股仍值得留意，股價調整正正係趁低吸納好機會。相反醫藥股今日雖反彈，但受內地藥品改革，帶量採購中標價大降所影響，未來醫藥股難有運行，仲有貨喺手，好趁反彈逃生走人，無貨想博反彈，要三思而後行，值博率唔高，寧願靠邊站。
雖然華為事件仍未解決，但內地5G發展唔會因此而卻步，剛成為國指及港股通新貴嘅中國鐵塔(00788)，半日再創1.44元上市新高，半日報收1.41元升3.6%。之前跟咗阿Man買貨嘅，可以訂番個止賺位喺1.35元，即係今日開市價，仍然喺呢個水平之上，不妨繼續持有。
今日阿Man喺《金融街密語》表示，近來唔少股仔急跌，係因為大股東或主要控股股東沽咗貨畀花旗嘅對沖基金套現，話口未完，上周五急跌逾六成後中途停牌嘅金誠控股(01462)，今日復牌就表示配咗股畀獨立第三方，股價點解急跌，畫公仔都唔使畫出腸。唔少呢類批股活動喺今年第四季相當活躍，家下臨近年尾埋數，唔排除仲有貨嘅對沖基金大把貨要沽，再見倒有股仔以顯著跌幅打入跌幅榜，唔使再考究係咪有莊家爆煲，反正呢類股仔平日無乜成交，再多十隻八隻玩高台跳水，亦唔會對缸邊友有乜影響。
麥狄文
(徐狄怡‧證監會持牌人)
