市場憧憬中美貿易談判進度理想,美股隔晚一度升逾300點,可惜美股暫時仍受逢高套現沽壓影響,走勢始終反覆,道指跟標指倒跌收市,而納指則蒸發大部份升幅。本以為港股反彈唔會勁得去邊,進知楓葉國批准華為公主保釋,雖然人未放,但可以返屋企候審,即係仲有數講,加上市場憧憬中美貿易談判進度理想,港股成功收復50日線(25953點)及二萬六關。
恒指裂口高開282點,順利回補周一遺下嘅下跌裂口,雖然升幅曾略為收窄見半日低位26013,但能夠喺50日線站穩腳,升幅進一步擴大至440點,見半日高位26212點。恒指半日報收26169點,升397點;國指則報收10405點,升160點。只要呢兩日大市企穩喺50日線及二萬六關,短線再挑戰接近匯聚一起嘅10日線(26413)及20日線(26297)機會甚大。至於能否繼續回補再對上一個下跌裂口,即26800水平,可能要到下星期方有結果。
重磅股唔再係騰訊(00700)一股獨升,大部份重磅股均錄得超過1%,甚至超過2%升幅。騰訊快將成功分拆QQ音樂喺美國上市,北水呢兩日積極掃貨,令其股價喺300元水平有甚強支持,今日半場再彈1.4%,留意反彈阻力仍然係330元,短線仍跑贏大市,所以博反彈暫時都係騰訊秤先。
其他重磅股今日總算肯畀多少少力,而大笨象(00005)喺63元企穩,今日重上64元,能否回補對上一個下跌裂口,要睇大市整體氣氛有否改善。內房股今日表現稍勝一籌,主要係有傳聞指本周五起舉行嘅中央經濟工作會議,或有機會放鬆信貸,令市場流動性增加。不過咁唔代表整體內房股能真正擺脫困局,雖然今日內房股普遍錄得3%以上升幅,但要高追值博率唔高,都係眼看手勿動。
基建股喺今次大市跌浪當中一直跑贏,大市氣氛略為好轉,資金又再流入基建股,似乎喺跌市當中,基建股係值得逢低吸納嘅板塊。相反賭業股就要逢反彈沽出,上月濠賭股已跌至一個七皮,稍為反彈又見大行唱淡,有大行報告指濠賭快面臨寒冬,亦調低部份賭業股目標價,今日整個板塊逆市走低。
恒安(01044)突然被沽空機構追擊,指恒安篤數偽造逾百億元人仔收入,股份實一文不值,股價曾跌逾8%,其後跌幅收窄至不足6%,中途停牌。不過阿Man認為真的假不了,恒安始終屬於基金愛股,一直有咁多間大行mon住,斷估要做假數唔容易,即管睇睇管理層停牌後點解畫,被狙擊股價跌不足一成,相對過往被狙擊嘅股份,恒安跌勢尚算溫和。
至於呢個星期晉身國指成份股及成港股通新貴嘅中國鐵塔(00788),股價今早一度創1.36元新高,半日升4.7%報收1.34元。鐵塔受惠5G行業發展,加上公司有雄厚背景,長線值得睇好,只係現價已升至接近唔少大行目標價1.4元,有心買貨亦等回吐至1.3元樓下。
麥狄文
(徐狄怡‧證監會持牌人)