隔晚美股又吹無定向風,早段道指一度跌逾500點,其後跌幅收窄,三大指數更拗腰倒升,可惜道指期貨再度走弱,港股今早欲彈難彈。隔晚恒指喺夜期時段一度底見25400水平,不過美股最終倒升,令港股今早未至大幅低開,開市跌逾百點見25623點,已屬半日低位,其後更隨內地股市倒升109點,高見25862點,可惜後勁不繼。中午恒指報收25723點,跌29點;國指則跌49點,報收10223點。半日成交額進一步縮水至362億元,咁嘅市況,缸邊友都無耐性玩落去。
重磅股個別發展,只有騰訊(00700)單天保至尊頂住個市,港交所(00388)亦升些少,幫助唔大,友邦(01299)僅升0.1元簡真無幫助。大笨象(00005)跌0.8%,暫時叫守住63元,以為聖誕鐘,炒滙豐,可惜聯儲局突然放鴿,甚至提早結束加息周期,唔受再惠息差擴闊,大笨象亦再無藉口炒上。其他中資金融股同樣有心無力,港股反彈困難重重。
雖然華為事件仍在發酵,而中國更向蘋果反擊,禁止蘋果喺內地發售部份型號手機,但竟然仍有大行唱好舜宇(02382),舜宇半日升4.4%做好,亦帶動其他手機設備股做好。不過阿Man都唔會輕易落搭,皆因華為事件充滿變數,一旦情況再惡化,整個板塊隨時又冚包散。
話咗石油股千祈咪高追,油價因OPEC同意減產,勁彈完隔晚油價又急挫,石油股今日受壓,油服股同樣陪跌。資源股一向唔係阿Man杯茶,唔買金礦股道指一樣,金價呢幾日因為市場避險情緒升溫而升至多月高位,金礦股呢兩日亦熱炒,但連最細粒嘅壇金礦業(00621)都連升六日,一度擺脫仙班,呢啲股仔都落埋鑊,金礦股仲邊買得落手。若然華為事件嚟個急轉彎,市場氣氛即可完全逆轉,屆時金價又可能行返轉頭。
暫時港股喺25700點爭持,25500至25600水平算係有些少支持,要睇埋米字旗國脫歐協議最終如何發展,再加埋中美貿易談判仲有冇數講,搞得掂個市當然死唔去。不過反彈力度暫時好有限,始終未見利好消息支持,半日連25800亦未能守穩,要收復50日線(25971點)談何容易。有利好消息支持的話,反彈至少要重上50日線先有得傾,再進一步回補周一下跌裂口。相反,中美關係再度惡化,米字旗國最終局住無協議脫歐,咁當然大件事,唔單止歐美股市大跌,港股陪葬唔在講,跌穿前底亦有可能。
麥狄文
(徐狄怡‧證監會持牌人)