熱門:

2018年11月6日 即巿股評 港股直擊

【盤房來料】美國中選跟議息前牛皮

經過上周五瘋狂過山車之後,累計升逾二千點嘅港股本周進行整固,噚日跌咗幾百點,重返26000水平之下,今日整固繼續。隔晚美國個別發展,道指跟標指保持向上,但「侵侵」點晒命話正調查亞馬遜、Facebook跟Google母公司有否壟斷,加上大行又調低iPhone未來銷售預測,大部份科網股均見腳軟,香港呢邊嘅科技股表現亦麻麻。

港股今日半場可以話乏善可陳,恒指今日隨美股做好高開127點,報26062點已屬半日高位,其後升幅收窄,A股半日跌1%,拖累港股亦倒跌最多107點,低見25827點。不過25800水平似乎守得住,半場報收25894點,跌39點,表現極度牛皮,半日大部份時僅於100點內上落。

預咗喺美國中期大選有結果前,缸邊友都唔會有所動作,再睇睇匯市情況,美滙指數仍然企喺96水平之上,人民幣離岸價叫另咗一日咁大把,呢兩日又去番6.92水平,A股自然難有作為。大市暫時喺25800至26100水平窄幅上落,之前幾日行咗大波幅,今日牛牛皮皮等大選結果。

唔少缸邊友都認為中期大選結束後,各地股市尤其美股要向下插水,阿Man反而唔係咁睇,反正美國民調已顯示,民主黨重掌眾議院嘅機會高達八成,但共和黨料可繼續保住參議院控制權,除非大選結果出乎意料之外,否則出咗結果之後,對股市影響未必好大。反而今明兩晚係聯儲局議息,即使市場已預計今個月議息唔會有變化,而下月再加息機會高達八成,但會後議息聲明,唔排除成為市場波動藉口,今日平靜過後,大市隨時又風起雲湧。此外,月底嘅G20峰會,特習會先係戲肉所在,即管睇下大選過後,「侵侵」會否即時變臉。

有消息指蘋果暫停iPhone XR新增專門生產線計劃,手機設備股跌到一仆一碌,整個板塊內嘅股份閒閒地跌逾1%,龍頭瑞聲(02018)跟舜宇(02382)分別跌6.7%及7%,前者日線圖更乍見三隻烏鴉,睇嚟上月低位55元隨時不保。至於其他科技股亦唔好去邊,晶片股捱沽較為嚴重。之前阿Man預咗科技股係死貓彈,事實上科網股威咗一兩日幾乎又打回原形,只有騰訊(00700)由250元水平低位大幅反彈後,目前仍保持超過一成反彈升幅。

講番騰訊將於下周三公布業績,其實今次季度成績表如何,大家都心中有數,之前股價急挫至250元水平,似乎已price in咗對盈利較負面嘅因素。所以騰訊業績過後會否再大插,機會只係五五波。但騰訊喺300元至310元阻力唔細,要重上該水平有難度,除非成業績出乎預期地咁好,否則騰訊大幅反彈後,可能回復上落炒波幅嘅格局。

其他重磅股偏軟,除咗「三桶油」升0.9%至1.5%,美國對伊朗實施制裁,或影響全球石油供應,短期內油價都係易升難跌。除咗科技股板塊較為疲弱外,阿Man多次提醒不宜沾手嘅豪賭股,今日亦跑輸大市。講到底港股只係處於熊市反彈浪之中,要扭轉弱勢暫時唔見得有可能,博反彈短炒要快手,否則又變成時令食品大閘蟹。

麥狄文

(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads