噚日執咗隻恒指熊(61662)出嚟，諗住繼續買跌嘅要原因係睇中下方牛證第一梯隊嘅貨又近又多，去到噚日朝11點35分，恒指5分鐘圖嘅SlowSTC(14,3)就上到超買水平，呢個時候(61662)嘅高位低就係$0.085/$0.084，取中位數$0.0845作為平均買入；去到下晝1點55分至2點25分，恒指5分鐘圖嘅SlowSTC(14,3)由前嘅超買回落到超賣，而呢個時候(61662)高低位就係$0.099/$0.093，平均數就係$0.096，計一計都有13.6%賺幅，Day Trade嚟講，呢個賺幅已算不錯啦。
當然，你可以選擇揸貨過夜，劍指24500至24599點呢part近牛，依家9點55分，恒指跌203點，做緊24609點，最低做過24587點，即係話淡友已經殺入最近嗰part牛證範圍；單見今朝個下跌裂口，手執熊證嘅都應該笑到見牙唔見眼；再加埋恒指開市後仲有得跌，(61662)應該都可以買到舊噚晚肥媽煎嘅斧頭牛扒返屋企加餸，反正聽日Halloween，今日唔買金多寶都當食餐好啦。
開恒指牛熊證街貨圖，見到下方牛證其實無咩得幾多貨剩，唔計已經被人攻入嘅24500至24599點，最重嘅街貨都係講緊得600張期指，同上方熊證最貼價又最重貨嘅25300至25399點嗰1146張期指，真係蚊比同牛比，用返頭先mark低恒指個價同熊證減一減，現價起步彈691點先可以上得到最貼價嘅熊證範圍，「係吸引嘅，但係最花咁多氣力，係咪值得先？」
值唔值得又真係唔係你同我話事，不過日日係咁望住個走勢無乜大變化嘅恒指圖確係有啲悶，但就咁啱得咁橋發現咗原來DMI嘅ADX喺恒指跌緊呢幾日佢係升緊：
| 日期 | ADX | 恒指低位 | 恒指收市價 |
| 10月24日 | 30.862 | 25194 | 25249 |
| 10月25日 | 32.644 | 24653 | 24994 |
| 10月26日 | 33.791 | 24589 | 24717 |
| 10月29日 | 34.786 | 24594 | 24812 |
| 10月30日(截至10點2分止) | 35.687 | 24587 | 24621 |
如果記得DMI嘅ADX係乜嘅讀者，我諗你未睇完成篇文已經走去開發行商網站，唔揀熊都揀Put出嚟。睇返上面堆數字，ADX愈升，恒指粒數就愈跌，即係話其實恒指呢幾日嘅跌勢係有力，唔係求其受到啲消息影響而下行。
重申下方牛證的確係唔多，但個市再跌唔排除會有資金開始反手追牛證/Call輪；目前恒指波幅指數已經上到嚴重超買水平且有回落跡象，即係話大市往後嘅波幅或會收窄，喺一個低波幅、慢跌兼ADX仍顯示有力嘅情況下，資金繼續流入好倉，一個唔留神分分鐘被個市將ADX嘅力爆發出嚟，狠插一刀，殺牛牛一個措手不及。
故仔我一廂情願咁諗啫，不過見日線圖14RSI落到31.292，彈一彈引近牛都真係唔出奇，恒指Put(13962)，行使價24200點，輕微價外兼高槓桿、低引伸，依家10點26分，恒指跌咗268點，5分鐘圖見SlowSTC(14,3)落到嚴重超賣水平，等一等先至好小注入市。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo(下半part)：#Gladyshan#
