熱門:

2018年10月16日 即巿股評 港股直擊

【盤房來料】港股假期前欲守25400水平

隔晚美股早段表現唔係太差,港股喺夜期及ADR時段亦伺機反彈,可惜美股尾市全線向下,港股今早高開後,跟港鐵(00066)訊號糸統一樣發生故障,升咗一吓就回頭,然後就甩晒轆,高開低走跌勢持續。恒指高開141點,曾跟內地股市上升。國家統計局今早公布嘅CPI跟PPI數字均符合預期,A股曾升逾1%,港股亦曾升267點,見26712點半日高位。但A股始弱不禁風,冇耐又回復跌勢,港股被亦被拖落水,曾倒跌66點,低見25379點,半日報收25396點,跌48點。國指則報收10168點,升24點叫做跑贏大市。由於明日假期關係,半日成交又縮水得400億唔夠,睇嚟下半場亦唔會升得去邊。

騰訊(00700)上周五反彈8%後,噚日已見回吐,今日再跌逾2%,股價重返280元樓下,要搵個理由解釋點解跌,大概係公司暫停回購有關。其實騰訊自阿爺要打擊手遊之後,股價一直未好過,連續兩日下跌已幾乎全數抺去上周五反彈升幅,若然再失當日大陽燭底陪273元,騰訊再創新低機會大,一旦273再失守,分分鐘要見埋265元前底位,甚至低於未算低。

其他重磅以友邦(01299)跌近2%影響交大,話晒屬於成份股重中之重,友邦唔掂,個市當然動彈不得,其他重磅股藍籌表現尚算偏穩,又見到中移動(00941)呢隻藍燈籠逆市升1.2%,反映資金棄增長股,寧可選擇有息派嘅防守股算數,避險情緒相當明顯。

市場擔心沙地跟美國關係惡化,一旦美國向沙地提出任何程度嘅制裁,沙地已威脅屆時將控制石油生產,令油價急升至每桶200美元。油價受相關言論刺激連升兩日,三桶油逆市做好,升幅由1%至2.2%。除咗石油股之外,煤炭股亦有資金流入,神華(01088)半日升3.5%,係藍籌股升幅之冠。中煤能源(01898)則發盈喜,股價半日升3.1%。不過對於煤炭股,又或者係整個資源股板塊,阿Man一向有偏見,易跌難升係其特色,仲要係十追九中伏,所以都唔建議追貨。

不過油價咁升法,航空股難免受罪,更有大行狠劈內地航空股目標價,三架飛機跌逾2%,不過本地航空股國泰(00293)跌幅仲大,半日跌3.1%,口痕友話油價升,國泰原油對沖輸少好多,咁樣跌法似乎唔啱數,阿Man就話面對行業競爭,加上國泰本身嘅服務水準下降,載客業務表現每況愈下,咁搞法油價再升都補唔番條數。

講番大市表現,弱過藥煲唔多識彈,主要係內地股市同樣彈唔起,尤其穿埋熔斷底部後仍一蹶不振,人民幣表現疲弱係致命傷。恒指目前喺25400水平爭持,短線支持喺25000至25200點,反彈似乎喺25600至25700點已阻力重重,除非大市能重上25600水平之上並企穩,否則想進一步反彈係妙想天開。尤其係幾隻指數權重股走勢疲弱,港股喺假期前夕能守得穩25400點都偷笑。

麥狄文

(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads