美國威脅再向中國額外徵收2670億美元中國貨品關稅之餘，更有消息指短期內宣布中國為貨幣操縱國，若然消息屬實，將嚴重打擊中美雙方已接近冰封嘅貿易關係，難怪隔晚美股曾因此急挫，雖然其後科技股帶動回升，但道指跟標指亦要下跌。至於港股連跌6日後，嚴重超賣之下，終見技術反彈。只可惜A股又腳軟，令港股走勢反覆，反彈力度不足，成交亦未見活躍。
恒指今早高開108點，一度急彈326點，高見26500點半日高位，不過A股又回軟，港股升幅亦曾收窄至53點，低見26226點，半日收市恒指報26286點，升113點；國企指數報10466點，升45點。
重磅股又係三桶油較有睇頭，油價回升令三桶油升0.4%至1.2%。至於避險至強嘅中移動(00941)則曾創八個月高位，半日升逾1%，愈來愈接近80元阻力區。大笨象(00005)跟友邦(01299)反彈，分別升0.7%及1.1%。內銀股跟內險股反彈力度麻麻，高開後升幅收窄，建行(00939)半日更打回原形無升跌。重磅股要數最慘情係騰訊(00700)，連日回購愈買愈低，今日半場低見290.4元，雖然散戶喺292元、291元及290元先後築起血肉長城嘅買盤，但對上兩條長城被大戶沽盤輕易做低，290元嗰個護盤區，睇怕亦唔頂得幾耐。騰訊連跌多日未見反彈，明顯係缺乏大盤支持買入，好老實之前大部份基金已滿倉騰訊，想再加注亦綁手綁腳有限制，更何況股價跌至現水平，騰訊亦唔講得上係便宜，失守292元，未知會否下試277元下一個支持位。
之前阿Man提過，目前中國為咗力挽經濟狂瀾，將會更大支持基建力度，果然鐵路基建股呢兩三個月一直跑贏大市，今日中鐵(00390)更創逾三年高位見8.01元；而中鐵建(01186)跟中交建(01800)亦齊齊升逾2%。睇嚟呢段時間，鐵建股呢個板塊仍有睇頭。
施政報告大家最關心係房屋問題，噚日陀地地產股偷步落鑊，不過今日報告面世後，反而走軟，幾時都話弱市咪高追，弱勢市高追上升股，好易中伏被綁。況且喺加息周期之下，地產股呢類息口敏感股都係避之則吉。
其他股份講真無乜睇頭，只要望望成交額，就知大市缺水情況嚴重，港股喺一浪低於一浪嘅慢熊走勢之中，個股乏人問津。家陣呢啲市況，唔出現大暴跌急跌，只係不斷陰乾，對於入場博反彈嘅缸邊友係伏上加伏。溫水煮蛙式慢速下跌，令大市更難成功尋低，港股低處未算低，未有耐搵得到個底。今日留意住26400點水平，企得穩或仲有些少氣力反彈至26600至26700水平，可惜半日26400關只係守咗好短時間，喺A股拖累下又腳軟，相反再失26200點，跌浪持續，博反彈唔建議，倒不如等個市挾埋呢浸再高沽。
麥狄文
(徐狄怡‧證監會持牌人)
