剛啱返到公司，依家係10點5分，今日遲咗喺因為今朝屋企發生咗段小插曲：我隻右眼無啦啦痛到爆，幸好我家老爺臨危不亂(我已經痛到失控咁滯)，衝落街買咗支眼藥水返嚟(我真係好怕滴眼藥水)，最後喺我幾經爭扎之下終於都滴完，再發多10分鐘吽逗到就無事啦，但嗰時我已經趕唔切平時搭開嗰班車，於是就搞到咁遲囉。
嘢都未食就返嚟開電視開電腦，見到依家10點9分恒指做緊26442點，升269點，如果噚日paper trade唔係紙上談兵嘅話，咁就真係成功捉到個轉角位啦。開恒指日線圖，見今日條SlowSTC(14,3)%K線(8.177)低位兜上%D線(6.711)，14RSI見回升，而噚日〈下半part〉時都有提出懷疑恒指係咪低位做粒「十字星」出嚟轉勢(認真如果得一粒「十字星」而無其他技術指標配合嘅話係無用嘅)，喺合理懷疑嘅情況之下，就當呢粒「十字星」湊效。
牛熊證街貨圖又點搞？下方最貼價嘅牛證26000至26099點，按噚日低位計係有少部份死亡，但見今日得返958張期指，比噚日走咗297張期指，明顯係好友將防守線向後退，唯暫時未見有一個好明顯嘅重貨區，所以只能估計大家退守嘅層數各有不同。至於上方熊證最貼價嘅由噚日見到27500至27599點，至今日落到27100至27199點，證明發行商好努力咁推新證上場，而喺27100至27199點見990全新新增嘅期指張期，就知大家對新熊上場都表現踴躍；27500至27599點仍然都係重貨區，有相當於1483張期指。而按照依家10點19分恒指做緊26482點計，現價同上方第一梯隊嘅熊證仲有成771點先可以食得晒，對比起下方只係爭428嚟計，上行嘅路仍然漫長，但按照技術指標同恒指日線圖走勢，恒指上行爬去食熊證嘅機會都唔細，一旦稍後《施政報告》唔知做乜有好嘢，將恒指點數再拉高啲，變成企係牛熊兩者中間嘅話，而同時上方熊證仍然有咁重貨區嘅時候，就咁更加知咩事！恒指牛(65233)，收回價25958點，同現價有逾500點差距，同一比收回價中槓桿最高，待5分鐘圖見超賣時小注落場。
題外話，如果有留意〈下半part〉嘅讀者，可能仲記得前日講嘅領展(00823)，話係避險之選，噚日見佢由70蚊唔到爬返上嚟70蚊樓上，仲一度升逾2%；今朝喺巴士上見到升逾3%，戰友Jack傳嚟message話黑石集團同領展洽購10個商場，哦...真係兒仔生性啦。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan
