香港呢期興玩high high，上月底高鐵通車go go go，咁又全城high high high ，噚日10月首個交易日，港股down down down，全城揩、揩、揩，恒指批咗六百幾點，一日失晒全部移動平均線，好友真係唔慌唔揩，係揩大鑊個揩。港股就揩到頭暈，人哋美股就high完再high，隔晚道指又創收市新高，報收26773點，不過標指跟納指下跌，升勢比較集中。有缸邊友等緊睇戲，只要恒指殺多三幾百點，隨時出現道指高過恒指嘅歷史性一刻。
至於港股半日表現反覆偏軟，恒指裂口低開見26840點，暫時係半日低位，即市回補下跌裂口曾倒升逾百點，高見27270點，可惜20日線(約27231)都係守唔住，半日報收26985點，跌140點；國指則跌24點，報收10730點。即市回補裂口再跌，咁嘅走勢當然唔多老利，唔排除午後再下試低位，今日暫時鎖住喺噚日枝大陰燭內運行，但低位當然已低過噚日。
友邦(01299)今日再插水2.4%，係藍籌之中跑第尾，大笨象(00005)低開後回穩，暫時半日報收67.8元，雖然半日幅圖見咗呢枝大陽燭係幾靚仔，可惜成交唔多配合，加上目前仍處10日及20日線之下，加上噚日咁大個下跌裂口，短期有機會再一路向西。至於中資金融股以內險股表現較佳，急挫後今日有反彈，但相對噚日跌幅，今日反彈只係杯水車薪。內銀股則繼續偏軟，單睇排盤都唔係幾開胃。
騰訊(00700)表示分拆音樂業務上市，但呢期QQ對於所謂好消息都冇乜反應，半日再跌0.7%，315元爭持，若然大市再向下尋底，QQ睇怕300元大關不保。雖然內房股有反彈，但限售樓花政策出台絕對唔係好事，內房股都係彈散格局，睇少眼亦無蝕底。
港股怕且要再向下尋找支持，指數相關股份暫未係博反彈時候，不如睇吓其他股份有冇機會。之前阿Man建議認購嘅華興資本(01911)，上市後潛水，但噚日大跌市竟能逆市向上，睇嚟喺22元低位已有支持。今日再逆市升6%，半日高收24.4元，雖然仍然潛水中，現價較招股價仍要跌兩成，呢啲價有得諗，都係用番今日低位22.95元或前低位22元作止蝕，博上番掛牌日嘅密集區至25元至27元，甚至博佢重返水面31.8元，都有一定值博率。其實華興資本市值過百億，應該有一定實力，集團主力投資創科項目，即係一般只有機構投資者或者大有錢佬可以參與有潛力嘅ABC至N輪投資嘅未上市項目，小投資者可以透過華興搞埋一份，算係另類前期創投機會。
不過華興資本過百億市值，要炒上真係要畀啲時間，反而呢期啲輕量級IPO，大部份一挾即上。呢個星期招股嘅美臻集團(01825)，以主板上市嚟講，屬於納米級別。是次集資額低過1億元，即使以上限0.44元定價，市值亦不過3.36億元。由於美臻喺2018年3月入表申請上市，所以港交所(00388)規定2018年4月1日後申請於主板上市公司，最底集資額為1.25億港元，最底市值要求為5億港元呢啲條件，美臻唔受限制之列。
美臻抽得過
而美臻係一家有近30年歷史又具一定規模嘅高级成衣製造商，格子乾濕褸嘅世界級名牌都係佢大客。集團三家成衣工廠中，有兩家位於斯里蘭卡，美國沒有對斯里蘭卡生產的成衣產品設限，而且斯里蘭卡享有歐盟GSP+優待，該國產品輸往歐盟享有低或甚至零關税。所以美臻係少數不太受貿易戰影響嘅製衣商。重點係美臻IPO訂價非常克制，為投資者留有相當水位之餘，同時降低風險。喺一般情況下，甚少主板上市公司股價跌破3億港元，家陣主板殼價衰極都值5-6億元，下跌風險有限，上面空間有得發揮，上到6億市值，股價已接近翻一番，IPO應該抽得過。
麥狄文
(徐狄怡‧證監會持牌人)
