上星期五(9月28日)揀咗隻恒指牛(67138)出嚟，其實拆開恒指5分鐘圖你就會見到條SlowSTC(14,3)由下晝1點25分開始，至到下晝3點15分，恒指點數係咁落，而SlowSTC(14,3)就keep住喺超賣水平，喺《下半part》時都有同大家講過，呢啲時候係會令人好不安，但都真係唔好喺超賣時放走Call輪/牛證。最後，皇天不負有心人，下晝3點15分打後恒指終於都叫做跌定，而分鐘圖上嘅SlowSTC(14,3)回升至上超買水平，最後收市前5分鐘圖上見到一支大陽燭，經過完一個下午心靈被個市摧毀之後，(67138)終於都可以走人。按可以入(67138)嘅時段高低位($0.073/$0.05)拉個中位數計，即$0.0615；再按(67138)水尾市做$0.057咁上下位置，即係話平均都只係輸五格，總好過今日開市返嚟被人斬咗一半有多咁滯啦。
依家10點8分，恒指做緊27444點，跌345點，老老實實，上個星期五報隻恒指牛出嚟，都係博個市向上28000點樓上嗰兩層過千張街貨嘅熊證區嚟殺，誰不知放完三日假返嚟之後就一個裂口向下啪，頭嗰5分鐘支陰燭真係長又長，以恒指暫時做過低位27371點計，27400至27499點最貼嘅牛證街貨已經陣亡， 而呢度有相當於938張期指；再落多層，即27300至27399點呢度就只係得132張期指，焦點就梗係落喺27200至27299點嘅1382張期指啦。
上面熊證咁重貨都唔食，唯一可以解釋就係28000點呢個關口位對恒指嚟講已經變成升唔穿嘅魔咒。日線圖上恒指依家回落返去50天線(27774點)以下，同時下方又有條20天線/保歷加通道中軸(27283點)，情況就好似對筷子夾住粒豆。當然，我都見到日線圖上嘅SlowSTC(14,3)高位超買回落，仲要%K線跌穿%D線，再加上由重回「下降通道」頂部回落，就算唔理條「下降通道」，齋都都似係一個「小圓頂」下行啦掛。
但見5分鐘圖上恒指嘅技術指標仲keep仲喺超賣水平，就算想入隻恒指熊(59713)，收回價28100點，同現價有逾600差距，我諗都要等一等先。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
