熱門:

2018年9月10日 即巿股評 港股直擊

【盤房來料】港股創14個月新低無眼睇

上周五美股全線下跌,市場擔心貿易戰愈演愈烈,加上美國經濟數據強勁,本月聯儲局加息幾近塵埃落定,令美股受壓,加上科技股走弱,美股升市派對隨時玩完。當晚港股夜期走勢已極為飄忽,但仍然偏弱,今早港股走勢亦然,反覆偏軟。恒指低開51點,26900點失守,跌勢加劇至最多跌411點,低見26562點,半日報收26733點,跌239點,跌勢算係有所緩和,但大市未能重上二萬七水平,期貨要守穩26900點之上,大市方能展開有限度反彈。國指半日跌93點,報收10465點,跌幅跟恒指叮噹碼頭。

本以為加息金融股受惠,但新興市場貨幣問題危機四伏,金融股一樣危危乎,友邦(01299)跟大笨象(00005)分別跌2.1%及1.2%,已拖低恒指94點。內地金融股同樣無運行,四大內銀跌0.9至1.2%,其他內銀股跌幅更超過2%。內險股普遍跌超過1%,只有平保(02318)跌0.5%,繼續強於其他內險股。

騰訊(00700)上周五開始見北水回流買入,公司亦出手回購,可惜銀碼實在少得可憐,股價早段反彈後仍難跌大市跌勢。不過騰訊有回購總好過乜都唔做,若要騰訊出現較似樣反彈,公司回購要繼續,最好主要股東及高層都身體力行增持,否則騰訊反彈仍乏力。

「侵侵」唔單止未有理會蘋果公司反對向中國2000億美元商品徵收關稅,更指要加碼再向2670億美元中國進口商品開徵關稅,更建議美國企業將生產線重設美國。拖一番言論拖累舜宇(02382)及瑞聲(02018)齊齊跌3.8%,其他科技股沽壓嚴重,半導體股亦成重災區。

除咗科技股仆直,早前曾落鑊嘅水泥股今日全線下挫,跌幅閒閒地超過4%,阿Man講咗N咁多次,咪見個別板塊落鑊炒去高追,高追以為執到寶,轉身稍慢都中伏。濠賭股喺上周已見顯著下跌,再加上九月係傳統淡季,整個板塊沽壓未減,今日繼續全線下跌。

不過大市自28500點水平雙頂回落,跌至26500點水平累計已跌2000點,雖然目前利淡消息充斥市場,但港股短線已呈超賣,短線作出弱勢反彈唔係無可能。只係港股仍嚴重缺水,加上北水亦唔多願入場,難聽啲講有錢都留嚟救A股,又點會對港股慷慨解囊。所以短線出現技術反彈,亦唔好有任何期望,尤其恒指已跌破技術熊死線,短線反彈至26900點先阻第一個阻力,往上再睇27300至27400點阻力更大。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads