|
熱門:

2018年9月6日 即巿股評 港股直擊

【盤房來料】兩大負面因素夾擊港股無得彈

美股隔晚分道揚鑣,道指終止四日下跌略為反彈,不過標指跟納指續跌,納指跌幅更超過1%。由於市場擔心新興市場國家,喺貨幣貶值情況下,未能按時償還債務,BATS唔係蝙蝠,係巴西、阿根廷、土耳其同南非嘅CDS(違約互換)成本急升, 以阿根廷為例,5年隱含違約概率升至41%,係自馬克里政府結束該國債務重組之爭以嚟最高水平。土耳其、巴西跟南嘅隱含違約概率,分別升至31%、18%及15%,由於面臨經濟衰退及政治風險上升,當中又以土耳其跟阿根廷大鑊。而新興市場貨幣危機,似乎已開始蔓延至股市,今日輪到菲律賓股市急跌2.4%,反映資金急於撤離新興市場。

港股噚日急挫超過700點後,今日未見有力反彈,恒指今日再低開174點,期指更穿二萬七開市,雖然內地A股反彈,曾令港股收復失地倒升,可惜其他亞洲區股市搖搖欲墜,港股又再轉弱下跌。恒指一度跌181點,見半日低位27062點,中午跌173點,報收27068點接近半日低位。國指則跌62點,報收10583點。

重磅股大部份無運行,只有兩大石油股中海油(00883)跟中石油(00857)逆市上升,因市場憂鬱地緣政治局勢緊張,支撐油價高居不下。其他藍籌股跌多升少,中資金融股從其排盤反映,目前仍然係沽多買少,即使北水有接貨,但仍難以消化外資沽盤。早兩日傳聞阿爺限制兒童及青少年打機,今日又傳出內地未來每款遊戲或徵稅35%,手遊股雪上加霜。騰訊(00700)果然失守前低位319元,開市低見316元,雖然曾反彈至322.8元,但連噚日收市價個影都見唔返,相信股價見300元係好快嘅事。其他手遊股全線向下,暫時呢個板塊仍然碰不得。

濠賭股喺暑假兩個月賭收未見突出,開始踏入9月傳統淡季,基金又向賭業股開刀,整個板塊受壓,濠賭股普遍下跌1%至5%不等。其他板塊都係瓜多過菜,教育股繼續捱沽,醫藥股亦唔見得有幾好受。

今日係美國結束對中國2000億元商品加徵關稅諮詢期,侵侵又打開口牌,指未準備跟中國達成貿易議,加上美國貿亦又創新高,向中國呢2000億商品加徵關稅亦理直氣壯。話就話市場早有心理準備,但實際行動又一定會帶嚟震盪。中港股市受新興市場危機及貿易戰兩大因負面因素夾擊,仲點會好得去邊,港股一旦失守26800前底,要見26200至26500亦唔覺得驚訝。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。