熱門:

2018年8月30日 即巿股評 港股直擊

【盤房來料】失守28400 反彈或告一段落

雖然美股隔晚又再升,港股夜期跟ADR當然亦拍住上,重上28500點水平,今早港股當然食住個勢高開。可惜美滙指數再回勇,而新興市場貨幣危機再現,土耳其里拉及阿根延披索再度急挫,拖累人民幣回軟,離岸價又重返6.83水平,即使人行已重啟「逆周期因子」,人民幣頂多係撐住唔見七算無再大跌,但要回復強勢簡直係天方夜譚。人仔腳軟中港兩地股市亦然,今朝大市高開低走,半日大市回吐,結束連升三日反彈之勢。

恒指今日高開117點,見28534點已經係半日高位,內地股市打倒褪,港股高開低走,一度跌226點,低見28190點,中午收市前跌幅略為收窄,報28242點,跌173點,失守50日線(28291點),暫時喺50日線附近上落。至於國指則跌67點,半日報收11015點。港股反彈本周兩度挑戰28600水平不果,大有機會形成反彈雙頂格局,反彈大有機會告一段落,又再反覆向下調整。雖然暫時未見有太大利淡消息可拖累大市,但魚缸嚴重缺水係事實,反彈至28600回落,大有機會再下試二萬八水平,甚至跌穿向下試27600至27800點。

唔少粉絲都問呢次反彈完,大市會否再破之前低位,阿Man唔識未卜先知,暫時都係且戰且走,大方向港股已進入熊二,當然後市易跌難彈。若然今次反彈28600亦唔到,一浪低於一浪嘅走勢不改,再穿底見新低當然大機會,要準確預測何月何日發生,阿Man就無咁嘅本事。但每次反彈浪都係逃生門打開,北水喺八月份急急撤資逾二百億港元,當中過半數為騰訊(00700)沽盤,話咗騰訊風光不再,跟大市齊齊玩一浪低於一浪,唔係阿Man批死騰訊,今次反彈過後係見到365元,唔見375元,同過到初一,過唔到十五一樣。

至於內銀股陸續公有業績,雖然月股價未見顯著受壓,但基本面確見轉差,資產質素受不良貸款額及客戶數目增加拖累下降,內銀股業績前一輪炒上,反彈浪隨住業績期過去告一段落。其他重磅股唔見有乜睇頭,能夠力保不失已算半事。不過本地銀行股確受惠其後港元息口趨升,東亞(00023)公布業績,核心盈利升26%,今日半場股價逆市升近2%。其他板塊輪流反彈,但反彈不過益咗想撤退嘅資金減持,阿Man無貨當然唔會自投纙網。

唔係話阿Man又長氣過啲長者,熊市反彈只係畀有貨喺手未撤退嘅缸邊友打開逃生門,早已有跟阿Man喺三萬二水平一直落持,家陣成個袋都係現金,正好鍊住舊cash食花生睇戲,短線博反彈唔係話唔得,但呢噚反彈都玩完,唔係話上到二萬八樓上先再追貨咁笨呀!!!

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads