真係唔貪心嘅話,噚日隻恒指牛(59410)喺10點50分見到SlowSTC(14,3)%K線出現單位數,過多5分鐘連%D線都單位數字,至朝早11點15分,恒指升幅放寬少少之後,%K線重上雙位數字水平,就用呢段時間睇(59410)嘅高位證價($0.063/$0.059)平均數$0.061作為買入價計,喺早11點25分時恒指忽然抽升,(59410)最高見過$0.067,數格仔得六格食,不過計落都有9.8%水位賺,若然你唔小注(大小注自己衡量啦),接近一成賺幅應該都可以滿足,又有覺好瞓,幾好。
話說噚日同事WingYi叫我帶屋企部量血壓機返公司比佢度吓,年紀大記性差,明明放咗喺枱面都唔記得拎,返到公司見到佢我先醒起,為免老人痴呆得太緊要,索性mark喺calendar度;mark完之後再開恒指走勢圖睇,依家9點53分,恒指做緊28293點,日線圖見今日恒指稍為回落,不過SlowSTC(14,3)就繼續向上,未見有回落跡象。
再睇埋恒指牛熊證街貨圖,上方熊證最貼價就係28500至28599點,呢度得109張期指,而重貨區就係28800至28899點,呢度有相當於1298張期指,同現價比就相差306點,而呢個位置亦相當於殺到上保歷加通道頂(28705點)多大約100點嘅範圍。坦白講,假設條保歷加通道水平不變,彈返上去保歷加通道頂嘅話,即係殺咗28500至28599點+28600至28699點呢兩個100點嘅熊證範圍,而呢度夾埋有相當於601張期指,量唔算多,但對於聽日(30日)就期結嚟講,都係貨呀。甚至乎安安穩穩過埋呢幾日,至9月時,又即係正式踩入Q4時再攞刀斬過都唔遲。
至於下方牛證,最貼價都講緊喺27700至27799點,同現價比個距離仲遠,就算個市唔向上殺近貨,無重大理由都唔似無啦啦向下衝一大段路都仲未見條村。今天不如觀戰吧!
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan#