熱門:

2018年8月28日 即巿股評 港股直擊

【輪證贏家】牛證仲有重貨喺度!

噚日見到恒指個勢咁強,真係有你無你將隻恒指牛(59288)隊落個市度先,臨尾仲話一度升逾600點,隻牛仔已經唔理佢咩位買、咩位走,總之就臨收市前將所有牛證賣走,古語有云:袋咗落袋先至係錢;之後就安安落落逃離公司,閃咗上出版社度,唔好誤會,我唔係再出書(寫書真係好痛苦),做人嘅嘢,咩都試吓啫。

今朝起身準備出門口返工之際,我家老爺突然話:唔對路喎,條隧道好似塞塞地咁;whatsapp我同事阿Jo佢話佢剛剛上咗巴士,但未入隧道就已經開始塞,於是變陣坐地鐵+shuttle返工,結果我應該早佢一至兩分鐘返到公司,唔緊要,反正返到嚟同我平時個時間都係差唔多就OK。

同PR Chloe同舊同事Tom吹完一輪whatsapp之後,依家10點19分,恒指做28433點,升166點,比起今朝今嗌升逾300點少咗好多,未開圖都知道今日係高開低走嘅實心陽燭,不過今日再次裂口一彈,最高見過28579點,同埋保歷加通道頂28720點只係爭141點。假設今日彈升300點後收窄到依家100零點,然後聽日再發力彈多100零點,彈穿埋條保歷加通道頂嘅話,呢件事對依家個市嚟講真係一都唔難,反正日線圖上技術指標都只係企喺中軸水平。

再睇埋恒指牛熊證街貨圖,以恒指暫時做過最高位嘅28579點計,先係28300至28399點,同埋28400至28499點呢1485張期指已經死亡,而28500至28599點呢480張期指裡面都有八成街貨死亡,某程度上都可以視28600至28699點為第一梯隊嘅熊證街貨,而呢度依家就只係248張期指;但對上兩級100點,即28700至28799點,同埋28800至28899點,夾埋就有成1448張期指;係呀,又係一個過千點嘅重貨區,如果後市先上28700至28799點呢度,即係話今日見嘅保歷加通道個頂就已穿咗;假設後市再上,整條保歷加通道頂中底都向上移,咁大市再食28800至28899點街貨時,好可能係頂住條保歷加通道頂,或者再次穿多一吓咁解。

仲咩有股份推個市上去?繼騰訊(00700)同平保(02318)之後,你望吓財經月曆,今個星期有啲咩股份排住隊等講業績?係呀,咪就係內銀股囉!四大行推個市上去有何不可?更何況依家只係講緊推多200零點嘅事。恒指牛(59410),收回價27752點,市場上見係最貼嘅貼價嘅牛證,但講緊同現有逾600點差距,高槓桿兼成交活躍;見依家恒指升幅進一步收窄,5分鐘圖見SlowSTC914,3)開始由中軸起步下行,再等多陣都未遲。

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo:#Gladyshan

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads