|
熱門:

2018年8月22日 即巿股評 港股直擊

【盤房來料】基本面變持貨死守非上策

美股表現強勁,標指再創新高,道指跟納指亦向上,帶動港股隔晚喺夜期跟ADR已先偷步再升。除咗美股之外,美元回軟人民幣中間價連升四日,港股今日反彈繼續,即使A股放軟手腳,港股照升可也,恒指已成功收復10日線(27754點),今日再向20日線(28030點)出發。

恒指今早高開83點,早段受A股拖累曾倒跌172點,低見27579點,其後港股回復升勢,重返10日線後,再升166點,高見27919點,差些少升抵20日線。半日恒指升142點,報收27895點;國指則升120點,報收10858點。

恒指升幅主要嚟自騰訊(00700)跟平保(02318),前者再升2.45%,後者則升近半成,合力為恒指貢獻122點。至於其他重磅藍籌股個別發展,中資股表現較佳,唯獨蒙牛(02319)逆市跌2.6%,成為表現最佳成份股。騰訊反彈突破355元阻力,今日一舉而上,但未能回補之前361元下跌裂口,加上北水持續流走,喺失去北水寵愛後,騰訊即使反彈亦唔會改變弱勢已成嘅事實。

人民幣回穩,對內房股帶嚟一定支持,加上中期業績表現不俗,令內房股得到資金追捧。多隻重量級內房股分拆物管業務上市後,相關股份均有出色表現,潤地(01109)亦唔執輸,表示有意分拆物管業務上市,加上中期業績核心業務勁賺1.5倍,刺激股價升近半成。其他內房股亦有追捧,升幅由0.2%至5%不等。不過阿Man提醒一句,聯儲局係唔會因為「侵侵」三言兩語就改變加息路線,美元只係暫時回吐,加上美滙指數喺95有一定支持,美元回升人民幣將再度回軟,屆時內房股反彈之勢亦將告一段落。情況一如早兩日勁彈嘅教育股,今日逆市回吐,主要係政策已有所改變,教育股超賣後反彈,亦不過係一時,之前強勢已徹底扭轉,博教育股反彈,唔識得喺適當時候落車,只係白炒一趟。

記得舊年曾經係阿Man愛股嘅美圖(01357),業績遲遲未有改善,今年上半年再錄得1.3億元人民幣虧損,更表示下半年虧損或擴大,股價逆市大跌17%,股價曾低見3.91元,目前喺4元水平死撐,睇嚟走勢只有愈嚟愈差。記得舊年美圖股價升抵20元水平,即日回吐至16元收市,阿Man已表示要沽貨套現,其後曾博反彈,但股價遲遲未能企穩13元之上,再指要全面放棄此股,待其業績有所改善再作打算。若然當時有貨喺手而未肯撤退,一直抱有希望以為有日可以重見家鄉,一年以嚟股價每況愈下,可見止蝕嘅重要性。阿Man想講嘅係,即使騰訊曾經係股王,但喺基本因素有所改變下,過往長升長有嘅日子或一去不返,持貨死守落並唔係最佳策略。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。