噚日港股喺MSCI換馬嘅被動基金買賣盤帶動下,成交急增至超過二千億元,恒指更報復式反彈411點。不過呢個超級重磅買賣盤只係一次性,並唔係成交急增帶動港股上升,所以港股仍未見突破。A股今日首日入摩,噚日又係被動基金入市,令上證指數被推高,今日雖未至於打回原形,但噚日強勢已不復見,升勢僅曇花一現。今日輪到恒指跟國指換馬,但規模遠遠不及噚日MSCI換馬,所以今日尾市就算有被動基金買賣盤,成交頂多都係增加三兩百億元。
隔晚歐美股市喺外圍貿易戰升溫下,全線下跌,雖然意大利政局危機有所舒緩,但美國向歐盟、楓葉國及墨西哥徵收鐵鋁關稅,即使惹嚟反擊,若然貿易戰嚟真,多個互徵關稅,定必影響全球經濟發展,歐美股市腳軟好正常。至於港股今日尚算靠穩,恒指恒指高開80點,開市後曾倒跌73點,見30395點半日低,其後喺內地股市收復失地下,曾回升112點,見30581點半日高,不過內地股市又回軟,港股未能企穩30500水平,加上多條移動平均線已形成阻力,港股未能進一步向上突破。恒指中午報收30417點,跌51點;國企指數報11961點,跌16點。
重磅股不復昨日氣勢,內銀股噚日反彈後,今日表現平平,暫時走勢仍未見突破,只係低位漸見支持。騰訊(00700)再被官媒抨擊,但竟然今次未有被洗倉,口痕友話本身股價已仆咗落嚟,加上有關指數換馬沽盤完成,沽壓漸減,股價自然未如去年一樣,畀阿爺抨擊影響下跌。不過唔再跌唔代表有得升,股價只係喺400元邊沿爭持,今日暫時又係陰燭一枝,未有扭轉其陰氣極重嘅弱勢。至於他重磅股唔見得有乜睇頭,普遍高開低走,經過五窮月之後,呢個六絕月亦唔好抱太大期望。
濠賭股經過幾日強勢,今日出現回吐,澳門最快今日公布上月博彩收入數字,預期增長介乎17%至19%,待數字公布,且看濠賭股係回吐調整,抑或升浪完成。繼續留意指數換馬股有否異動,不過今日周末前夕,似乎再異動都只宜觀望,未直衝動掃貨。
留意今個月係多事之秋,除咗花旗議息之外,市場仍觀望特金會能否水到渠成,另外要留意歐洲政局發展,意大利政局不穩似有轉機,但那邊廂西班牙首相或面對被罷免。而美國喺貿易戰上動作多多,事先張揚月中公布有關500億美元中國商品徵稅清單,暫未知中國如何應對。喺多個不明朗因素左右之下,估計港股繼續有波幅,冇升幅,留意番隔夜拆息已升至1.5厘,之前阿Man講過拆息持續上升唔係好現像。反正六絕月係四年一度世界盃盛事,阿Man已將倉位減至極為保守水平,準備全情投入世界盃,預計唔少缸邊友都有同樣諗法,呢個月港股即使指數表現唔太絕,都要預咗成交再縮水。
麥狄文
(徐狄怡‧證監會持牌人)