熱門:

2018年5月8日 即巿股評 港股直擊

【盤房來料】騰訊反彈留意阻力在四百前

隔晚美股做好,不過收市前升幅收窄,但港股反而無乜影響,今日高開後愈升愈有,話咗港股跟美股相關系數正減少,其實港股根本就自有一套運行軌跡,即使噚日A股做好,港股一樣乜都唔跟,三萬關得而復失,個樣睇落弱過藥煲,偏偏今日又玩自high,甫開市已收復三萬大關,更進一步重上10日線(30336點)水平。

恒指今早高開129點,開報30124點,其後升幅擴大至最多升388點,高見30383點,但未能重返20日線(約30433),半日報收30345點,險守10日線,半日升351點。國指半日報收12154點,升188點,升幅暫跑贏恒指。

講過十萬八千次,恒指等於騰指,騰訊升,個市有運行,騰訊昏迷,港股亦陷入休克狀態。隔晚蘋果公司創新高,多得畢非德加持,雖然騰訊仍未被股神睇中,但跌咗咁多日,花旗嘅科技股做番好,騰訊高位回落逾兩成後反彈亦好正常。騰訊半日反彈2.5%或9.6元,報收389.6元,剛好重上10日線(387.6),留意呢個位企唔企得穩,企唔穩,彈完又係得個吉。始終騰訊牛證街貨多得很,雖然375元至380元水平嘅牛證大幅減少,但並唔代表捧場客投降,只係退守至360至370元,亦即係其250日線(362元)射程範圍之內,今日反彈若然得唔穩,騰訊仍有機會下試250日線順手劏肥牛。

至於其他重磅股亦全線反彈,大笨象(00005)、友邦(01299)、港交所(00388)、平保(02318)升幅由0.9%至2.7%不等。無獨有偶,上述幾隻重磅股,今早都剛好反彈止首個阻力停步,能否進一步反彈帶領大市向上,阿Man唔作猜測,反而大市仍處於區間內上落,29800點未有下破,上面亦難升穿30800點,大戶就係呢一千點內已經可以玩死缸邊友。中資金融股亦見回升,四大內銀升0.7%至1.3%,不過合共只為大市貢獻55點升幅,助力唔算大。中國容許境內險企繳納保險保障基金等免徵企業所得稅,內險升幅顯著,平保、國壽(02628)均收漲逾2%,兩股貢獻恒指46點。

捷榮咖啡非上限定價留水位

平安好醫生(01833)叫做有反彈,不過現價仍較招股價54.8元低,仍然潛水中,噚日阿Man話新經濟股表現麻麻,對其後排住隊上市嘅新經濟股唔好期望太高,反而留意舊經濟股,當中有新股上市或有驚喜。上周阿Man叫大家不妨認購捷榮咖啡(02119),上周五完成招股已截飛,市場反應不俗,缸湖傳聞國際配售部份超額20倍,而IPO部份更錄得150倍超額,而需要啟動回撥機制。咪以為超額認購爆晒燈,捷榮一定以上限2.19元定價,聽聞老闆跟上市團隊認為新股掛牌後,點都要預留水位畀缸邊友,決定以唔夠兩皮大約1.98元定價,留番炒作空間畀市場。之前阿Man都講過,集團已承諾派息不少於純利35%,從歷史數據反映,新加坡上市時派息比率高達50%至60%。集團業務以內需及民生為主,受經濟周期影響低,防守性高,未來進一步發展內地及東南亞市場,市場增長潛力高,適合長期投資的收息一族,若然周五掛牌開價合理,不妨考慮上車。

阿Man今日預早提醒大家,皆因明日起開始放大假,《盤房來料》將暫停至下周三,即5月16日再復刊,呢幾日大市估計都係區間上落,掌握高低波幅自己執生。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads