熱門:

2018年5月3日 即巿股評 港股直擊

【盤房來料】教育跟濠賭股吼回吐吸納

隔晚美股走軟,雖然聯儲局維持息率不變,但由於通脹已接近達到2%目標,市場預期下月加息機會達百分百,恐怕息魔來襲,美股扭轉早段跌勢,尾跌急急腳回軟,道指失守二萬四關。至於港股低開低走,恒指低開315點為半日高位,其後跌勢轉急,恒指再度失守全部移動平均線,半日最多跌605點,低見30119點。恒指中午報收30213點,跌509點;國指亦跌227點,報收11966點。

重磅股四大天王全線向下,本來已死咗火嘅騰訊(00700)已盡失昔日光彩,400元由支持變阻力,接咗大股東減持批股405元嘅貨,仲要坐艇廿皮,都咪話唔灰。今日半場跌8.2元,報收385.2元,又接近上周低位。莫非大戶為咗盡殺街貨牛,一定要逼騰訊插水落去370元至375元先收手,短期騰訊都係有波幅,冇升幅,估計至少要頽到下次公布業績。

上星期講過平保(02318)跌穿80元仍未宜撈底,皆因低處未算低,失守80元仍要向下尋底,下一支持大約喺71元,50周線附近,即係現價計仲有幾蚊可以跌。明日旗下平安好醫生(01833)掛牌,今日收市留意下好醫生暗盤價,一旦明日好醫生高開低走,平保隨時衰多幾錢重。

小米正式申請上市,為首間同股不同權(WVR)上市申請,市場預計小米登陸本地魚缸之後,將返內地市場發行CDR,發行成功的話,小米將成為中資新經濟股,港股+CDR首個案例。估計小米之後陸續有新經濟股排隊上市,港交所(00388)點計條數都係有着數,可惜港股偏弱,港交所難以獨強,反彈未見阻力265元,260元未到已先回頭,半日跌1.3%報收255.8元,剛好喺10日及20日線附近爭持。

四大天王之中,只有大笨象(00005)無懼息魔來襲,相反更受惠利率向上,股價雖然裂口低開,但低位有承接,股價一直守住77元,半日報收77.5元,挨近77元可試試撈貨,預期呢段時間仍可跑贏大市。至於內銀股繼續下跌,其實阿Man諗極唔明內銀股乜事咁慘情,照道理內銀股現價估值唔貴,加上業績公布亦符合預期,挨近20日線呢啲位,撈貨亦博得過。

美國貿易代表團今明兩日訪華,不過市場普遍對雙方達成協議不抱太大期望,尤其貿易戰背後科技冷戰先至係戲肉,阿Man之後喺《金融街密語》講過,為阻止中國科技進步,成功自我進行高科零部件研發,唔會咁輕易讓步。科技股即使有反彈都僅僅曇花一現,既然值博率唔高,何必申手接飛刀。

反而教育股今日跑出,預期呢個板塊可以繼續跑贏大市,之前阿Man推介嘅教育股,喺大市上上落落期間仍然得一個方向,就係持續踩住條上升軌向上,每當呢個板塊回調,就係撈貨好機會。至於濠賭股陸續公布業績,澳博(00800)派完成績表獲大行上調評級及目標價,不過股價創8.83元兩年半新高後升幅收窄,未宜高追,整個板塊都係要吼回吐吸納。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads