熱門:

2018年4月18日 即巿股評 港股直擊

【盤房來料】人行放水亦未能扶起A股

噚日港股受到拆息上升,同埋A股插水兩面夾擊,即使外圍股市做好,港股仍插水,更逼近三萬邊沿,險守三萬點收市。當缸友心灰意冷,認為三萬久守必失,兼且要再一次下試月初低位之際,阿爺突然出招,人行忽然宣布定向降準,向市場放水4000億人仔,以加強小微企業支持力度,以抵禦經濟下行壓力或可能加大。隔晚夜期跟ADR均重上30400點水平,加上美股連續連升兩個交易日,港股今早亦順理成章高開。

恒指高開407點,一度重上10天線(30338點),並高見30487點半日高,可惜A股走勢疲弱,未受降準消息提振,港股亦隨其急回,一度倒跌83點,低見29979點,失守三萬大關。恒指中午報30146點,升83點;國企指數報11938點,升38點。

講過超人出得嚟掃貨,個市暫時未死得,可惜只係長和(00001)跟長實集團(01113)有運行,齊齊升逾1%,但大市仍然喺唔生唔死階段,正確嚟講,恒指喺多條移動平均線之下,基本上仲係醫院養傷中,一旦下試月初低位,分分鐘要轉入ICU。港股唔重返多條平均線,即10日線、20日線(30543)、50日線(30797)及100日線水平(30600),仍然動彈不得,繼續處於有波幅,冇升幅嘅狀況。

尤其港滙長期逼近7.85弱方兌換保證,金管局接港元接到手軟,幸而HIBOR隔夜及一個星期拆息稍為回落,走資情況略見舒緩。不過兩星期及以上嘅拆息亦未有回落跡象,反映息口正趨升,若然走資再度加劇的話,對港股當然有負面影響。而人行放水呢個本來利好股市嘅消息,被市場解讀為去槓桿政策不變,放水係略為寬鬆貨幣,但信貸仍然收緊,只針對扶助微小企業。既然信貸唔放鬆,即係市場唔會有平錢拆借,對A股當然無大太幫助,A股今日繼續插水。

騰訊或再向下劏牛

其他重磅股大部份高開低走,雖然內銀股仍錄得升幅,但開市價已見半日高位,升幅水瓜打狗,無咁一截。騰訊(00700)股王當頂皇冠,喺業績之後已掉咗落嚟,再加埋大股東減持,燈神央姐接貨,股價今早見393.4元創今年新低。騰訊牛證重貨區第一間口395元先流第一滴血,但牛仔最痛區喺380至385元,未知騰訊會否因此流向不止,定要下試該水平方罷休。唔少粉絲都問騰訊可以撈貨未,阿Man認為要有心理準備騰訊繼續受衍生工具所影響,而喺未有特別利好消息之前,或再向下劏牛。當然作為長線投資,分段買貨未嘗不可,只係視乎個人持貨能力,騰訊無乜位幾時買做好,純睇技術走勢,家陣梗係眼看手勿動。

發改委表示汽車行業將分類型實行過渡期開放,直至2022年通過5年過渡期,汽車行業將全部取消限制。汽車股幾乎全部仆直,呢期華晨中國(01114)仆得最慘情,集團主要產銷華晨寶馬,但家陣進口寶馬減稅大平賣,有得揀同一個品牌,不如買進口貨唔買土炮貨。至於其他產銷自家內地品牌嘅汽車股,面對進口車競爭,以後都頭痕,股價下跌亦屬正常。不過阿Man認為吉利(00175)有先見之明,早已入股Benz 母公司戴姆勒,係今次進口汽車稅大減中,受影響較少嘅汽車股,加上稱得上做「姐夫股」,待其股價喘穩,或可考慮吸納,記得上次低位20元,距現價僅一步之距,留意20元能否守穩。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads