熱門:

2018年4月13日 即巿股評 港股直擊

【盤房來料】20日線守穩仍有上升空間

侵侵一時一樣,之前口口聲聲話打貿易戰好,忽然又同習大大話係老友,仲話好好傾,中美貿易戰話可以避免。跟習大大紮完馬,轉個頭又話要同普京鬥一番,喺中東挑起戰火,不過呢唔夠兩日又話自己無話過要打敍利亞,即時美俄關係又緩和,隔晚美股當然乘勢做好。至於港股隔晚喺夜期跟ADR重上三萬一關後,今朝高開即掉頭,高開低走。

恒指今早高開237點,報31076點已經係半日高位,連噚日個高位都破唔到,掉頭回落亦好正常。50日線(約30956點)再次得而復失,最多跌131點,見30707點半日低,又喺20日線(約30741點)附近回穩,中午收報30807點,跌24點;國企指數報12258點,跌30點。暫時恒指喺20日線跟50日線之間上落,想收復31000失地,首要條件係先企穩條50日線先有得傾。

央姐威力唔嘢少

不過熊證街貨持續增加,似乎唔少缸邊友睇死港股上到三萬一就無以為繼,但美股跟入業績期,只要放榜企業交足功課,美股仍有機會再下一城,下周港股仍然有機會發力挾淡倉同殺熊證。問題係火車頭騰訊(00700)呢期走勢較弱,缸邊友可能怕咗央姐呢枝大光燈,近年西京投資投邊隻死邊隻,雖然死嘅都係細價股,但央姐威力唔嘢少,望就望騰訊唔好畀佢燈死,否則大市再向上亦有心無力,皆因恒指等於騰指,騰訊行唔郁,恒指升極有限。雖然油價仍處近日高位,但三桶油回吐,大市更加少咗上升動力。大市暫時守住20日線,多得大笨象(00005)跟平保(02318),前者市場憧憬公司隨時再出手回購,後者則計劃分拆平安好醫生,回到咁上下就見買盤出嚟撈貨。

強勢板塊仍然輪流落鑊,今日輪到醫藥股抖氣,總理李克強主持召開國務院會議,要求從5月1日起,對進口抗癌藥實施進口零關稅,加快創新藥進口上市。進口藥零關稅,削弱國產藥品競爭力,點計數都係負面消息,加上之前醫藥股累計升幅有番咁上下,想撈貨都要睇定啲。醫藥股回吐,換嚟教育股上升,不枉阿Man周二推介中教控股(00839),今日上半場已升逾5%,睇嚟要破前頂應不費吹灰之力。另一可留意教育股為新高教集團(02001),同樣逼近前高位,希望呢鋪順利坐六望七。

濠賭股除銀娛(00027)菲律賓賭場計劃觸礁回軟之外,其餘均逆市上升,除銀娛之外,永利(01128)亦係阿Man睇好嘅濠賭股,剛得到大行祝福,大幅調高目標價,股價升至超過三年新高,半日升逾4%。金沙中國(01928)相對其他濠賭股落後,中場收入佔比較大,料可受惠中場博彩收入上升,股價若能企穩45元,有望挑戰前高位47元,可以望多兩眼。

臨近周末預咗今日港股有回吐,但只要20日線守得住,港股下周仍有機會再挾高,不過三萬一水平再買貨值博率唔大,始終仍然係區間上落,只係已留平貨未必急住要落車,等唔等多幾百點博周末,大家自己衡量風險。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads