熱門:

2018年4月4日 即巿股評 港股直擊

【盤房來料】100日線遲遲未收復偏淡

放咗幾日復活節假期,開兩日市明日又放假,缸邊友又邊有心機入場,預咗呢兩日個市都係唔嗲唔吊咁款,結果今日港股確係升又冇本事,但跌又跌唔落。雖然隔晚美股顯著反彈,但港股無氣力跟住上,主要係唔少缸邊友仍外遊未返,加上北水暫停,成交更見淡靜,半日成交只有520億,買賣兩閒,靜靜局局。

恒指今早隨美股高開64點,開市後曾升148點,見30329點半日高,可惜高位力不從心,反覆回落至最多曾倒跌146點,低見30033點,總算保住三萬大關。恒指中午報30157點,跌22點;國企指數報12122點,跌14點。

早於復活節假期前,阿Man已表示多隻重磅股走勢轉弱,假後幾隻重磅股未能復活,仍然死氣沉沉。騰訊(00700)叫做勉強守住405元大股東批股價,咪就係勉勉強強咁守住,半日跌2.8元,報收406.6元,一旦科技股又遭殃,騰訊或失守405元,進一步下試上月低位,甚至下試380元至395元牛證街貨重貨區屠牛。再一次提醒嗰啲長期持有牛證當正股坐嘅缸邊友,咪以為405元係鐵底必守。

至於平保(02318)公布上月保險收入大減,雖然有春節長假嘅季節因素,但難免成為阻礙其回升嘅理由,股價暫時險守80元,但始終弱勢已成,除非股價能重上82.5元方能有轉機。至於大笨象(00005)繼續貼住地板行,平保停手唔掃貨,加上集團亦未啟動新一輪回購計劃,暫時缺乏利好消息,股價短期亦難有運行。至於港交所(00388)只係略為反彈,股價早已跌穿2月低位,一日未見科技獨角獸嚟上市,加埋成交未回升,港交所再重返265元扭轉跌勢唔係咁容易。

今年係醫藥股嘅世界,資金對呢個板塊嘅寵愛程度有增無減,國務院表示將促進仿製藥研發,落實稅收優惠政策和價格政策,符合條件的仿製藥企業可獲減稅。一個好消息又炒起整個板塊,唔少股份再創新高,升幅閒閒哋3%或以上。

至於科技股表現仍偏軟,美國貿易代表辦公室(USTR)正式公布,向一系列中國進口產品徵收關稅的清單,涉及產品的價值估計為500億美元(3900億港元),主要是高科技產品,相關股份跌勢未止,只有個別股份作死貓彈,但顯然彈力不足。

暫時大市仍然區間上落,話唔定要過埋呢個星期,好淡才能分出勝負,雖然以港股整體估值計算絕對係便宜,但個別重磅股去年累積升幅驚人,而技術走勢亦欠佳,牌面睇落大市易跌難升。不過大戶部署,又點會咁易睇得到,目前只有多作短線操作,減少倉位預留較多現金,一旦市況急轉直下亦無冇怕,反而短時間內大幅下挫,係撈平貨博反彈嘅好機會,但指數喺三萬點水平之上值博率唔高,加上大市已連續多日處於100日線(30484)之下,遲遲未能收復失地回升,恐怕港股仍然會係有波幅,冇升幅格局。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads