隔晚美股受貿易戰陰霾所影響,三大指數齊跌,港股夜期跟ADR都仆咗落去,今早港股順理成章低開。坐咗淡倉或熊證過夜嘅淡友,滿以為今日大市要仆落去回補30900至31000點裂口,可以安安樂樂等食大茶飯,港股又重施故技,好似噚日下午拗腰以上,半日仲要倒升。今朝有糊唔食,又化為烏有,得個坐字。不過好友亦唔見得有好日子過,大市始終未能突破31800點,呢個阻力唔嘢少,除非突破此關,否則好友亦會順風順水。目前嘅市況就係好淡都不是人,阿Man上周已提醒大家炒股唔炒市,少理短線指數波幅,集中精神炒個股。
恒指低開253點,以為50天線(31344點)失守要插深啲,但上半場最多跌313點,見過31121點半日低位後已止跌回升,其後更拗腰重上50天線,最多倒升101點,見31536點半日高。恒指中午收報31473點,升38點;國企指數報12715點,升30點。基本上大市仍然喺大約一千點內遊走,下面淡友等補裂口再失守,好友等突破31800點後再挑戰高位,目前都係上上落落,未見突破。
目前股市面對最大風險係估佢唔倒嘅特朗普,白宮人事變動令人無所適從,而貿易戰亦升溫,令市場避險情緒急升。不過阿Man暫時未睇倒港股有急劇下挫風險,主要係眾多重磅股排住隊派成績表,而騰訊(00700)、平保(02318),以及內銀股等等,都已預期可以佳績示人,即使派完成績表,股價未知係見光死定係見光起,至少短線未有藉口要掟貨。
況且恒指領頭羊騰訊,對恒指升跌舉足輕重,騰訊股價又再逼近前高位476.6元,半日盤中最高見470元,半日報收467.8元,只要資金稍為落力少少掃貨,騰訊已有機會再破頂。由於市場普遍相信,即使貿易戰明刀明槍打起嚟,科技股受貿易戰影響有限,所以自貿易戰陰霾籠罩美股,納指仍能創新高兼跑贏大市,相信騰訊亦能倖免於貿易戰爆發。既然恒指又叫騰指,騰訊無事恒指亦唔死得乜出樣。另一指數重磅股平保今日亦有回勇跡象,股價升近3%,重上50日線,短線阻力喺88.8元,企穩呢個位上面,可向92元水平出發。
醫藥股炒作派對未停過,每次回吐果然就係吸納機會,今日又唔少醫藥股創新高,教育股情況亦差不多。面對貿易戰一觸即發,呢段時間當然要避開出口股,尤其係以美國業務為主嘅股份,而航運股及航空股亦有機會受拖累。預期以內地本土市況為主嘅醫藥股、教育股跟內需股可持續跑贏大市。內房股則唔受貿易戰影響,兼且未見阿爺再打壓樓市,近日亦有貨金追捧個別內房股。
以前阿Man講過珍珠奶茶(01705)上市後必炒,但亦未能預期升幅可如此凌厲,噚日收市已較IPO價高出3倍,今早股價再被炒高至7.9元,半日亦升逾四成,成交12.9億元,交投活躍,唔似得之前個別被炒高嘅創板新丁,乾升得個挾字。不過珍珠奶茶現價較招股價升五六倍,噚日已有畏高症,今日更為係得個睇字。新股純炒供求,有日肯入場接貨,無話咩叫高位咩叫低位,總之都係嗰句,有糊唔食,罪大惡極,錢要袋入自己袋先係錢。
麥狄文
(徐狄怡‧證監會持牌人)