本來都以為「侵侵」只係用水槍打貿易戰，加上白宮內對收關稅反對聲音不少，隔晚市場曾認為貿易戰應得到紓緩。不過當今日大家好夢正甜之際，白宮經濟顧問科恩突然請辭，消息再一次震散各地股市，道指期貨再度急挫400點。去年8月當科恩大跳草裙舞，威脅辭職之際，美股亦曾出現大震盪。今次同侵侵就徵收關稅意見不合拍晒枱，究竟係科恩拂袖而去，抑或「被辭職」就不得而知，只係知道白宮走咗一個受華爾街歡迎嘅經濟顧問。市場亦膽心科恩一走，侵侵更多幕僚將劈炮走人，美國將會亂上加亂，每當市場遇上不明朗因素，避險情緒自然升溫，股市呢類高風險資產，當然無運行。
隨住亞太區股市齊齊插水，港股早段低開186點，低見30324點，但竟然淡友未見再發功，隨着A股回升，港股半場更曾倒升162點，高見30673水平。可惜隨住內地股市升幅收窄，目前20日線(30621點)患得患失，早段收復後未幾又失守，中午恒指跌107點，報收30403點；國指則跌56點，跌11254點。
重磅股個別發展，騰訊(00700)表現反覆，盤中曾高見441.2元，但半日仍然要跌0.7%，報收435.4元。至於其餘三大火車頭亦全面報跌，港交所(00388)跌0.8%，暫守280元；平保(02318)82元似有支持，不過半日亦要跌1.3%；大笨象(00005)則跌0.3%，暫時叫76元支持不俗，但76元一旦失守都幾大鑊。
中銀監放寛內銀撥備覆蓋率監管要求，由150%下調至120%至150%，俗稱撥備紅線下調，對內銀股盈利有正面影響，內銀股普遍回升，可惜因大市回軟而升幅收窄，目前表現以建行(00939)較佳，即管睇吓狠沽咗幾日嘅北水，今日會否因為呢個消息又追貨。
話咗炒股唔炒市，阿Man一直堅持醫藥、教育跟內需股呢幾個板塊，今年可持續跑贏大市，逢回吐吸納板塊內龍頭股跟績優股絕無問題。藥明生物(02269)發盈喜後，股價升完再升，今日又創新高，半日升幅由13%收窄至8%，高位難免有獲利回吐。國指新貴石藥(01093)回一回，今日逆市升1.7%；阿Man曾推介嘅中生製藥(01177)升2.4%；神威藥業(02877)升0.9%；康哲藥業(00867)升1.9%，全部報捷。教育股以剛納入「港股通」嘅新高教集團(02001)表現較硬淨，而一向貨源歸邊嘅中教控股(00839)逆市創新高，其他教育股個別發展，總之吼住幾隻龍頭，逢回吐吸納一定有着數。
麥狄文
(徐狄怡‧證監會持牌人)
