熱門:

2018年2月27日 即巿股評 港股直擊

【輪證贏家】冷吼 銀娛Call博靚績

噚日朝早見個市彈完開市嗰一下之後就回塘,寫緊隻稿嗰時恒指做咗全日低位31273點出嚟,恒指5分鐘圖SlowSTC(14,3)當然見超賣啦,只可惜未能捉得到呢一下入隻call輪等鐘擺反彈,因為我仲未交稿囉;唔緊要,去到下半場1點20分到,恒指當時做緊31300至31400點咁上下,嗰時稿又交晒,飯又食飽,早早揀定嘅恒指Call(16964)可以落場作鐘擺操作。其後係2點15分到,恒指5分鐘圖SlowSTC(14,3)由超賣彈反上超買,不過當時見(16964)升到0.242元,對比1點20分買入時嘅0.238元,只係升得4格/1.7%,若然本大嘅計落都可以賺到粒下午茶嘅;但若然本細嘅,就反正本細落,過一過夜嘅話,今朝見恒指開市升292點時,(16964)仲唔掉走佢等幾時喎;記住,輪係唔可以同佢坐艇鬥長命架。

睇返恒指日線圖,依家10點10分,恒指高低位分別係31798點同31632點,暫時同噚日都有個裂口存在;但對比起2月7日個裂口嚟計,嚴格嚟講都叫做補咗嘅。噚日收市恒指上返條20天線之上,今日粒燭就更加完全企入保歷加上升通道,雖則依家恒指升幅有所收窄,且今日條20天線(31273點)又似繼續下行跌穿條50天線(31008點),但留意番,下底條10天線(30863點)努力抽升中。平均線嚟講最理想就更係同六合彩啲彩色號碼球一樣,由上至下、細至大(天線無分左右)順序咁排列,好似今年1月恒指日線圖咁,由排最高嘅10天線,一直向下順序排20、50、100同250天線。Anyway,依家唔係順序排唔緊要,但若然三線滙聚嘅話,咁滙聚嗰一個point都應該會被視為頗有力度嘅支持。

業績期開始咗,當對住市無咩諗法嘅時候就會變成「炒股唔炒市」,今日友邦(01299)晨早就公布咗截至11月底止17/18年度全年業績,由於業績好過預期,所以今朝早出咗粒陽燭裂口高開,仲彈穿埋條50天線(64.82元)添。明日就港交所(00388)業績,蓋上年個市火紅火綠、全民皆股,推到成交額過千億是等閒事,擺到明好生意啦,不過港交所股價其實都升咗唔少,今日無情白事出咗粒陰燭添。

聽日出業績嘅仲有銀娛(00027)。濠賭業的確係經歷過低潮期嘅,但根據澳門博彩監察協調局嘅數字,去年每月幸運博彩毛收入按月計個個月都係見升,平均每個月升19.2%,都反映到濠賭業走過低潮。

再睇銀娛日線圖,銀娛剛好完成咗個「V」型反彈,依家上到頸線(約70.7元)水平,SlowSTC(14,3)%K線同%D線分別報82.96同71.78,係超買但呢啲敏感度高嘅技術指標,見8或9字頭亦是等閒事,而且銀娛條10天線(66.74元)準備升穿20天線(66.89元),「短期黃金交叉」出現之餘仲將五條主要平均線順序排番好,若然交份靚仔業績出嚟嘅話,先爆個「短期黃金交叉」出嚟,再升穿埋條頸線,嘩!銀河牛(57025),收回價 65.18元,同現價有逾6%距離,小注落場;點解唔揀Call?你自己Search吓啦,成交又無街貨又多,點揀啫。

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads