上個星期五(2月23日)捉隻貼價、中期Call輪，博一下子由價外變價內嘅爆炸力，將輪價炸上去。經過周末同屋企人打完牌，再加埋睇完個冬奧閉幕禮(喺電視睇啫，零下三度喎…你估我仲後生咩！)嘅洗禮之後，差啲將呢件忘記得一乾二淨，好彩依家每朝早幾乎都有電視台嘅同事send個message比我，話我知恒指開乜(其實叫我send push notification之嘛)，先至喚醒番我三日前做過啲乜。
今朝恒指開升261點，報31528點；返到公司時見到恒指升幅收窄到得返44點，做緊31311點，條20天線(31338點)我今朝出push時仲話佢收復咗添架，依家一個唔該又跌返穿，且同50天線(30947點)愈來愈近。雖則恒指呢期唔係話升得好勁，但咁樣慢慢彈吓彈吓，都彈返上2月7日個裂口31712至31472點裡面，無錯，裂口係用嚟補嘅，不過會唔會彈一下補完之後又好似依家咁高開低走，就真係無人知啦。
依家10點22分，同完老媽whatsapp吹水後，恒指點數上仍然無咩大變動，以暫時最高做過嘅31567點放落恒指牛熊證街貨圖上計，即係話恒指今朝係踩入過31500至31599點，呢度有相當於776張期指，屬於熊證重貨區；拆細啲用50點為一個範圍單位睇，原來31500至31549點呢度有716張期指，計及最貼價嘅31300至313994同31400至31499點呢兩個已被食嘅熊證計算，今朝大市total食咗825張期指。望望月曆，今日26號，聽日就係期結，就算今個月大戶湊夠期指張數，最多都只會企係度等下個月嘅開始；若然係唔夠數嘅話，斷估都唔會貿貿然向下衝落山坡、再過多兩個山頭同埋十條村，走去食牛證咁遠征掛。繼續用貼價Call先啦，恒指Call(16964)，行使價32158點，2%輕微價外，以恒指5分鐘圖SlowSTC(14,3)見超賣就入，超買就出，作短線鐘擺策略。
作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]
