港股呢幾日玩單跳，日升日跌，玩死班指數炒鬼，不過阿Man上星期都講過，港股係要同你玩range，之前喺50日線(30899)點上下三四百點上落，發展到呢個星期，上咗一級喺50日線同20日線(31403)同你玩住先。由於呢兩日期貨結算前踏入轉倉高峰期，單日波幅開始收窄，不過都有三四百點，總好過之前吓吓玩瘋狂過山車，單日波幅五六百點係最低消費，激起上嚟行過千點，缸邊友食幾多驚風散都補唔番。
隔晚美股雖反彈，但高位回落升幅收窄，道指仍然喺50日線下面運行，再唔行番上去，情況都幾棘手。至於港股則繼續反覆，今早恒指高開323點，一度發力升超過400點，見31387點半日高，但喺20日線阻力唔細，高位回落曾僅升185點，見31151點半日低位。恒指中午收報31226點，升260點；國企指數報12697點，升169點。
有人認為港股反彈浪已近尾聲，隨時迎來新一輪跌浪，但阿Man並唔係咁睇，雖然呢幾日大市表現較為反覆，但每日指數底部一個高於一個，只要時機成熟，有機會再展開升勢。問題係港股都係無乜個性，即使現水平PE仍算便宜，之前美股插水一樣跟住車尾，阿Man最怕係美股反彈完成又要向下炒，或防礙有機會已完成調整嘅港股重拾升浪。暫時係美債息左右大市，希望美債息生生息息，尤其10年債息最理想係落番2.9%樓下，否則逼近3厘警戒線，缸邊友晚晚有得震，冇得瞓。
不過今日幾隻重磅股表現僅算合格，騰訊(00700)昨日急跌市，半日反彈不足1%，彈力似乎麻麻。反而港交所(00388)喺下周三派成績表前，股價表現算硬淨，股價一直守住280元。至於內險龍頭平保(02318)表現亦唔差，只係暫時受惠20日線。安邦遭中保監接管一年，前老頂被正式起訴，但中資金融股未見有太大影響，半日大多數見反彈，升幅由0.9%至1.8%不等。
內房股今日見資金追捧，講真阿Man預咗今年阿爺將繼續遏止內房炒風，內房股要回復去年強勁氣勢有難度，今年未能勝舊年，短炒無妨，長揸無謂。至於資源股繼續追落後，炒作呢個板塊內嘅股份唔容易，總之高追通常無乜好結果。
半新股鑊剷派對未落幕，但今日開始多咗啲創仔落鑊，阿Man不得不提高警覺，都係嗰句，半新股短炒唔阻閣，又係Day trade較穩陣，話之佢翌日再升，每日計數每日入場，好過持貨過夜，一日都可以兩個世界，更何況過咗一晚更易變天。
麥狄文
(徐狄怡‧證監會持牌人)
