內地股市紅盤高開高走，睇個款今日應該報升收市，證明意頭呢家嘢，對於中國人嚟講仍然好重要，而一向國際化，受西方思想較深嘅香港，就冇呢枝歌仔唱，狗年港股首個交易日係紅盤高開低走，倒跌收場，不過噚日港股喺缸邊友憧憬北水回歸可推動港股向上下，缸邊友偷步掃上，噚日港股勁升超過500點，恒指高收31432點。可惜好景不常，美股隔晚表現反覆，早段大幅反彈，道指更一度升逾300點，曾帶動夜期高見31500點水平，其後聯儲局公布1月份議息紀錄，聯儲局繼續睇好美國經濟，但表示通脹升溫，亦暗示有需要或再加息。市場解讀為息魔殺到，美國10年期債息高見2.9厘以上，債息一升又推冧股市，結果美股三大指數倒跌收場。
至於港股喺夜期時段開心咗一陣，半夜ADR跟新加玻黑期已仆直，兩者均跌至31200水平之下，拖累港股今日低開。恒指低開347點，早段最多挫501點，曾失三萬一點，低見30930點，50天線(約30850點)明顯有支持，跌幅之後收窄至239點，曾高見31192點，中午報收31095，跌336點；國企指數報12572點，跌114點。至於A股假後復市表現強勁，上證半日報收3261點，升62點，接近全日高位。
阿Man之前講過要逆向思維，北水情人節當日開始暫停，港股反而愈升愈有，今日北水回歸，即市上半場北水錄得淨流入，大媽繼續掃貨，但港股照跌可也，北水雖然喺港股話語權愈嚟愈大，但港股發球權似乎仍然喺華爾街班大哥手中。
其實港股由上星期展開反彈，由低位累計已回升超過2000點，噚日恒指逼近20日線(31496點)，今日借勢回吐亦無可厚飛，加上噚日急升逾五百點，但成交只有九百幾億，仲衰過年三十晚半日市都接近800億，挾倉意味濃厚，今日出現回吐唔覺得意外。而噚日偷步掃貨等北水回歸嘅缸邊友，今日又要買個教訓。但港股係咪反彈至20日線前就行人止步，阿Man又覺得未必，只要A股有力再上，港股仍有條件喺31000水平附近稍作整固後，進一步向上挑戰20日線，甚至回補31600至31700點巨型下跌裂口。話晒港股大病初癒，重新向上都要一步步嚟，未可以操之過急。
重磅股噚日急升後回吐，最奇怪係建行(00939)，A股勁升3%，H股跌1.8%，不過都係嘔番噚日一半升幅多啲，暫時股價受制8.55元。騰訊(00700)跌1.3%，亦只係回吐噚日升幅唔夠一半，友邦(01299)跌1.9%。「三桶油」受油價回調影響，股價回吐1.6%至1.9%。大笨象(00005)今日除息，噚日掃貨搶息，行動都算成功，半日靠穩報80元；而恒生(00011)則升0.5%。
油價略見回落，內地航空股又落鑊，幾隻航空股跟A齊齊爆上，之前講過長假期航空股必定落鑊，今日三隻內地航空股，分別升5.7%至7.4%。半新股繼續有得炒，之前阿Man推介過嘅澳能建設(01183)，今日創1.98元新高，半日升一成報1.94元。其他半新股亦有資金追捧，但炒半新股都係快嚟快去，入場炒作至緊要出入平安。
麥狄文
(徐狄怡‧證監會持牌人)
