美股噚晚用崩盤嚟形容都唔算過份，單係道指急跌362點，創自舊年5月以嚟最大單日跌幅，而噚晚夜期跟ADR港股已被拖累，跌至32400點水平，今日順理成章低開。恒指低開171點，報32435點，開市後曾倒升，不過未完全回補下跌裂口後急跌，最多曾跌276點，見32330點半日低位。以為大幅拋離10日線(約32678點)就無得救，港股本身市底強，即使要展開較大幅度調整，亦會先反彈，加上今日場外OTC結算，扯番高啲結算價亦合理。加上道指期貨喺「侵侵」發表國情咨文下反彈，帶動港股最多倒升214點，高見32821點。恒指中午收報32745點，升137點；國指則回升82點，報收13473點。
幸而阿Man早於月初發現狂牛已至，已提醒大家要綁好安全帶，因為單日跟單周波幅將擴大，每日500點波幅亦屬等閒事，大家早有心理準備，可以輕鬆面對急如其來嘅急升急跌。港股反彈當然唔少得幾隻指數重磅股，騰訊(00700)早段低開455.6元，最低亦不過見455.2元，其後已止跌回升，並重上463.2元(10 日線)之上，注意股價能否重上470元，未來企穩470元，今日只能視為調整中嘅反彈，要回復強勢言之尚早。至於港交所(00388)於20 日線(283.6)有支持，盤中低位284.4元，半日倒升2%，重上293.8元。至於平保(02318)同樣喺20日線89.25元前有支持，半日回升2%，重上92.05元。不過幾架大市火車頭除騰訊外，仍未重上10日線，仍未能確認調整完成。
至於昨日回軟嘅內銀股跟內險股，同樣跟隨大市拗腰，但都係嗰句，大市由33500點回落至32300水平，回吐僅 1200點，遠遠未能滿足一個健康調整市嘅回吐幅度要求，今日反彈後，大市短期未能企穩32800至32900點水平，仍有反覆回落機會。以黃金比率計算，由12月中28200點起步升至33500點，合共錄得5300點升幅，回吐 0.236，即1250點，接近呢兩日跌幅，如果回吐0.382，大市有機會穿一穿20日線31954點，回吐2025點，有機會調整至31475 點，不過呢啲都係估計，一個強勢市，未必要完成所有黃金比率回吐，只要大市企穩10日線，再重上32800-32900點，呢兩日調整可視為短暫震倉。當然阿Man未能百份百肯定，總之32500點不容有失，再失守調整幅度必然加深。
由於阿Man早已表示在三萬三水平減磅，目前並非全數滿倉，大市重上32900點企穩再追貨迎升浪，抑或待調整向下分段回補已套利之貨，都可以從容不迫，進可攻，退可守，現階段需要謀定而後動，反正仲有兩星期過年，稍作中途休息，整個一月戰績已不俗，無需要咁博命。
麥狄文
(徐狄怡‧證監會持牌人)
