噚日恒指裂口下跌之後，雖然朝早嗰段時間拼咗條老命咁向上爬，但可惜爬到上裂口頂之後(係有倒升過嘅)，成班淡友就企喺個裂口頂，一見到好友隻手爬到上頂時就一腳踩落去，力都唔留咁將好友踢返落去，跌到最底見32501點，10天線穿到唔穿；雖則話收市時叫做企返係條10天線以上，但今日再開市時就已經成粒燭跌咗落10天線(32662點)樓下。
日線圖上啲技術指標都由此前嚴重超買出現回落，MACD見「熊差距」；SlowSTC(14,3)嘅%K線好明顯咁穿咗%D線；14天RSI都由最高峰嘅88.41回落到依家見66.52；至於DMI嘅+DI同-DI嘅差距都開始收窄。若然轉過去睇周線圖嘅話，今個星期呢粒陰燭同技術指標個樣都似有耷頭嘅跡象。
依家10點28分，恒指做緊32418點，用呢口價計數，開恒指牛熊證街貨圖，上方最貼價嘅熊證33000至33099點，同現價比就差582點先可以踩得入呢個範圍，而呢個範圍裏面就有相當於108張期指，一啲都唔多；至於熊證重貨區就要數到上33500至33599點，呢度有1585張期指，跌兩日就儲到過千張期指嘅街貨，都幾反映到大家都想個市跌咁喎。
再睇埋下方嘅牛證，用恒指暫時做過嘅最低位32330點嚟度，即係話32500至32599點、32400至32499點同埋32300至32399點(就當呢個位穿埋啦)，呢三個最貼價嘅牛證全數死亡，而呢度夾夾埋埋都有成1144張期指架。同時32200至32299點就變成依家最貼價嘅牛證，呢度就有相當於771張期指；若然再落多100點，即32100至32199點呢度，都有685張期指架，比起上行嚟講，下行so過上行；再加上恒指日線圖上，由上年12月初恒指踩住咗條100天線起彈跳嗰一下至早兩日築成嘅「上升通道」，都被呢兩日嘅跌市破壞咗，唔好話由依家起步落多200點，就算落夠300點，即返番去32000點，街貨嚟講就可以total食到1645張期指，走勢上嚟講有條20天線(31937點)做支持，個位靚到唔落都幾乎對唔住自己咁滯。
恒指熊(61386)，收回價33000點，同現價有逾500點嘅差距，約37倍槓桿適中，重點係成交勁度活躍，容易走位，吼恒指5分鐘圖見超買先好入市，動作快嘅就做day trade；心狠手辣嘅就小注望20天線；學我老師陳望祖話齋：「要堅持，做人要有信念！」(佢啱啱WhatsApp同我講嘅，但係我諗有時都要睇情況啩！)
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
