噚日恒指尾市好似憑住最後一啖氣，衝咗上去33018點之後就掉頭，收市時落返去33000點樓下。而噚日推介嘅恒指牛(69126)係上半場11點15分，適逢恒指5分鐘圖SlowSTC(14,3)見超賣，於是小注落場；承如噚日所指「見到恒指又『創新高』嘅話就好收手啦，乜你唔覺呢期恒指『創新高』完就好興回落啦咩？」係囉，噚日恒指穿33000點時講緊只係3點半到，有成半個鐘頭比你走貨，咁你都唔走就真係咪鬼怨人。
恒指今朝先開出陽燭，開市報32979點，升21點；依家10點鐘，恒指已經由升轉跌，做緊32831點，跌127點，大隻藍籌就更係見紅啦，不過正因國際油價上緊高位，事關沙地阿美石油公司原嗌上市雖然嗌咗好耐都仲未搞掂，但堂堂咁大間石油企業，上市定價一定唔係一個幾毫呢啲size啦；再加上美國總統特朗普反環保分子，唔用石油唔通用天然氣咩，係咁嘅情況之下油價有乜可能唔發圍先得架，又that's why小妹推完吉利(00175)再推昆侖(00135)，噚日見恒指單腳企係個頂度都唔知會唔會累街坊，於是拿拿聲搵位走隻昆侖Call(11453)，為求明哲保身；誰不知今日隻昆侖逆市曾升逾3%，(11453)喺10點9分升45%。都係嗰句：昆侖輪呢啲冷到爆嘅輪，真係唔可以用揸正股嘅心態去對待，萬一甩轆就真係喊都無謂。
睇返今日個市，老實講恒指日線圖上由上年12月初至今呢條「上升通道」靚到無仇報，但同時技術分析條線都係咁捉向上，今日一跌終於見到恒指嘅技術分析有耷頭嘅跡象；不過都要比個面望一望恒指牛熊證街貨圖，睇吓恒指係咪真係有個「下台階」。
依家10點20分，恒指報32715點，跌242點，最高做過32998點。上方熊證最貼價嘅33000至33099點有相當於65張期指，而再上多100點，即係33100至33199點呢度，就有相當於467張期指，呢度唔係重貨區(重貨區係33500至33599點，但講緊都只係得545張期指)，熊證貨量愈嚟愈唔吸引嘅目的只有一個：啲錢博大市超買再超買後出現調回，於買近熊，由市就係咁升，由買近熊變遠熊都搞唔掂，輸到連底褲都無埋，咁你話仲邊度有錢敢買熊？
下方牛證最貼價嘅係31900至31999點，呢度有相當於2034張期指，絕對係牛證重貨區，而呢個位置同現價就有815點嘅差距。同樣地牛證所謂嘅貼價講緊都有成800點差距嘅原因就得一個：市上得太快而新輪證未出到咁貼，呢樣嘢你又無得怪輪商，事關要推一隻新輪證出嚟時，其實佢都要經過上市呢個過程，就算轉用Call輪買升，輕微價外個啲講緊都要成三毫幾子，重到都唔識跳咁滯。
理論上，恒指連升七日又上埋33000點樓上，點都要唞一唞，呢個表面證供絕對成立；但背後熊證同現價近，唯一麻煩位只係唔夠貨；今日一個幾百點嘅下行會唔會係引番啲錢入熊證用嚟儲貨再食呢？今日都係收一收手睇定啲先再作決定。
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
