隔晚美股再創新高，港股當然不甘後人，連升五個交易日後，今早再下一城，繼續向上尋頂。恒指今早高開逾二百點，雖然升幅曾略為收窄，見過32554點半日低位，但其後再度發力，最多升429點，高見32823點歷史新高。中午報收32775點，升382點；國指則升215點，報13420點。
重磅股四大股王今日拍住上，不過又係大笨象(00005)最乏力，奇怪係晚晚ADR都企定定喺86元之上，但喺港股呢邊，86元又這麼近，那麼遠。騰訊(00700)表現強勁，盤中創469元上市新高，半日報收468元，裂口高開唔回頭，話咗騰訊只有買貴，永冇買錯。至於港交所(00388)亦創306元新高，半日報收304.4元，升1.1%，完全無回頭嘅意思。平保(02318)逼近紅底，盤中創98.85元新高，半日報收97.4元，暫時喺開市價之下，唔排除升咗個幾星期，差不多要唞唞。
至於濠賭股繼續走好，永利(01128)派成績表又交到功課，裂口高開後盤中曾高見30元，但有獲利回吐沽盤，半日報收28.8元，留意暫時出咗枝大陰燭，走勢上似要回吐，暫時冇貨不宜高追，有貨或考慮食一食糊。至於其他濠賭股亦出現同樣情況，濠賭股公布完營運數據同業績，唔排除又再高位整固。
噚日阿Man講過，內銀股回吐無有怕，反而係吸納好機會，今日內銀股又再發力，建行(00939)跟工行(01398)齊創逾十年新高，分別升3.1%及1.9%，內銀股現水平仍算合理，今年受惠息差擴大及資產質素改善，屬於強勢板塊。除咗內銀股，內險股同樣走強，除咗平保創新高，其他內險股半日至少錄得1%以上升幅。
噚日4S汽車股表現較佳，汽車產銷商近日股價持續向下，但今日吉利(00175)受創辦人以每股均價24.99元增持消息刺激，股價半日急升近9%，帶動其他汽車股齊齊向上，普遍升逾2%。不過以勢輪勢，4S汽車股跑贏，汽車產銷股目前只能視作反彈。暫時只有比亞迪(01211)算係完全轉勢。
大市仲要行到幾遠先停，阿Man一向以穿頂唔估頂作為宗旨，但礙於大市由月初至今，已升2800點，月波幅已超越平均每月波幅要求，而熊證街貨亦殺得七七八八，大市隨時有機會停落嚟抖抖，短線再追貨值博率唔高，即使大市可以超買再超買，但亦總有要停落嚟嘅一刻。加上明日開始踏入期指轉倉高峰期，單日走勢更難捉摸，阿Man建議有貨繼續持有，想加注先忍忍手。
麥狄文
(徐狄怡‧證監會持牌人)
