熱門:

2018年1月17日 即巿股評 港股直擊

【盤房來料】券商一落鑊 大市又要唞

港股昨日午後升幅擴大,更以全日高位31905點收市,創收市新高。至於美股隔晚先升後跌,港股夜期跟ADR同樣走勢,見過32000關倒跌,拖累港股今日早低開。恒指低開79點後,一度跌262點,見31642點半日低位,其後跌幅曾收窄至只有6點,見過31897點半日高位,可惜未能收復失地,暫時31900成為阻力。國企則跌42點,報收12744點。

大市能否短期再創新高,視乎四大股王能否發力,暫時除咗大笨象(00005)力保不失之外,騰訊(00700)、港交所(00388)跟平保(02318)均見回吐。騰訊低開後曾倒升,但半日仍要跌0.6%,單日波幅正收窄,似營造旗形走勢,旗形突破向上定向落,暫時睇向下居多。至於港交所算係強,盤中一度收復失地倒升創291.4元,可惜連289元都企唔住,暫時雖然高過開市價,但現價出咗針頂,咁唔係幾好睇。至於平保失發軟蹄,半日跌1.5%,睇嚟又要唞唞氣。

大笨象隔晚喺ADR係威係勢,可惜今日返嚟見一見85元即掉頭,暫時持平算係咁。幾隻重磅股唔行,大市亦唔叻得去邊,預計暫時喺31600至31900之間整固,31600點係短線支持,不容有失,失守調整再加深,至少要回番落去31300,若然沽壓湧現,進一步向下調整至30800亦可。相反有市要創新高,必先要企定定喺29500點大關。

碧桂園(02007)趁市旺抽水,配股發債合供集資約234億元,但配股價暫時失守,半日跌6.4%,拖累其他內房股走軟。至於內銀股,今早創逾兩年半高位後回吐,建行(00939)跟工行(01398)都要倒跌,其他銀行股個別發展。內險股龍頭下跌,但國壽(02628)竟然追落後,逆市升1.8%,炒到落後股大市難免要回氣,反映缸邊友唔多肯再高追破頂股,寧買入落後股博一博。

阿Man一向最最最唔鍾意券商股,次次呢個板塊落鑊,就換來大市下跌,不過A股向好,成交回升,券商股齊齊追落後,升幅至少超過2%。唔少缸邊友問券商股追唔追得,跟資源股一樣,券商股高追好已中伏,阿Man寧願錯失券商股升浪,亦唔想貿然入場被綁變蟹。不過資金轉追落後股嘅情況都幾明顯,可能大家都有畏高症,寧願執平貨。

西王發盈喜兼恢復派息

講開券商股算係藍燈籠,資源股雖然唔係藍燈籠,但亦出咗名難少,不過西王特鋼(01266)剛剛發咗盈喜,預期今年業績大躍進,2017年度股東應佔溢利將較去年同期大升1.5倍,即係現價PE又要打個五折有突,現價PE得番唔夠4倍。集團盈利大增主要因為集團受惠政府取締中頻爐及有關鋼鐵業去產能有利政策影響下,唔少鋼鐵企業產能明顯減少;同時,國家環保檢查力度增大,關停部分環保不達標企業,導致鋼鐵供應量下降。集團去年自行生產的鋼鐵產品銷售量約300萬噸,每噸毛利約630元。由於政府批復大量基建工程,地產開發業開工率高,需求平穩,對鋼鐵需求進一步上升,鋼鐵價格持續回升。另外,鋼材價格持續升高,營業額上升,原料價格上漲平緩,利潤空間加大,鋼材毛利同步上升。集團應可維持強功嘅業務及盈利增長能力,中長諗得過,唔怪得之公司最近跟分析員更新公司發展同資料,唔少分析員對其睇法都正面。集團同時亦宣布自2017年起,以後將向股東派發股息,亦增加其及引力。不妨趁現價收集,股價上望目標2元,跌穿1.5元止蝕。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads