美股強到無朋友，隔晚三大指數再創收市新高，帶動夜期跟ADR隔晚回升，今早港股繼十三連升後，再破十年高位，一度升穿31300點，暫時已連續第四個交易日上升。恒指高開177點，開市後曾升至31381點，創逾十年新高。其後升幅曾收窄至77點，見31198點半日低位。恒指中午收報31211點，升90點；國企指數報12398點，升103點，跑贏大市。
重磅股方面，騰訊(00700)噚日急跌逾10元後，今日反彈，可惜彈力麻麻，半日報收431.6元仲要低過開市價，睇嚟北水開始錄得淨流出後，騰訊上升勢力已大減。至於大笨象(00005)雖未至於錄得北水流出，但昨日北水流入資金大大縮水，今早先升後回，創過84.4元高位後，半日倒跌近0.6%，報收83.55元。噚日大笨象裂口高開，仲要打咗粒十字星喺上面，搞到日線圖出現黃昏之星走勢，今日回吐難免。至於港交所(00388)噚日回吐完，今日係反彈，不過又係彈力麻麻，兼且上半場仲要收陰燭，股價企唔到272元，短期繼續回吐整固。至於平保(02318)半場亦要報跌，高低位波幅有限，暫時整固中，上升形態未改，總之都係睇住80至82元呢個位。
油價持續向上，「三桶油」莫非係處於真。升浪裡頭，中海油(00883)升2.30%； 中石化(00386)升1.56%；中石油(00857)升1.53%。不過對於油價阿Man唔認為會爆升，雖然OPEC守承諾減產，但美國頁岩油產量則有增無減，國際油價能夠重上80美元都偷笑，想重返三位數，睇怕得個諗字。四大股王升勢放緩，大市再向上除咗靠三桶油之外，內銀股功不可沒，留意內銀股升勢開始蔓延至二線銀行股。
雖然油價回勇，將增添航空股成本上升壓力，但有大摩唱好，魔笛追魂下，中資航空股保持強勢，略為回升今日又回勇。要買航空股當然係中資航空股睇好一線，不過油價回升，對於過去幾年因為油價對沖而輸到嘔白泡嘅國泰航空(00293)嚟講，絕對係好事，近日股價隨油價回升向上，即管睇吓能否再挑戰13.5元之前高位。
醫藥股話咗係逢回吐吸納板塊，今日又有股份創新高，藥明生物(02269) ，中國生物製藥(01177)、三生製藥(01530)、華潤醫藥(03320)跟麗珠製藥(01513)，齊齊創上市新高。呢個板塊嘅股份輪流破頂，選擇花多眼亂，阿Man始終最睇好石藥(01093)同中生製藥，作為創新藥業內領頭羊，要買醫藥股都係揀龍頭。
港股今日收市大有機會十四連升，紀錄不斷打破，不過再強嘅市都需要唞氣，只要大方向上升格局不變，而目前又未見市場有進行大槓杆買賣，港股就算有回吐亦能處之泰然。回吐短線支持位30800點，至於上面睇幾多? 穿頂唔估頂，純以牛證街貨重貨區作參考，31500點都走唔甩。
麥狄文
(徐狄怡‧證監會持牌人)
