|
熱門:

2015年3月27日 即巿股評 香港財經

【盤房來料】志道爆煲 熱炒股個別發展

大市表現乏善可陳,指數唔上唔落,可能同下周一期指結算有關,或者要到下星期大市先會有更明確方向。可以較為肯定係歐美股市點腳軟都影響唔到港股,只要內地股市靠穩,一直較為落後嘅港股搵唔到一個理由要大屠殺。

二三線股仔精彩得多,志道國際(01220)今早一度跌逾五成低見1.2元,跌得急自然大把炒鬼衝入去博反彈,最高反彈至1.8元樓上,1.3元至1.5元掃貨執兩成幾都幾和味。鼎和礦業(00705)噚日調整一日又嚟料,今早曾高見0.325元,上半場收報0.265元仍錄得15%升幅,不過見完高位急回,可能要抖抖氣。

噚日推介隻華彩(01371)冇乜動靜,仲要倒退兩格報0.62元,家陣唔上唔落成交又靜咗,既然指揮官話等下星期開快車,唯有坐定定等運到,但跌穿0.59元短炒先打靶。中國礦業(00340)唔生性,失守0.18元果然調整幅度加深,加上志道咁插水,亦拖累大部份升幅大股仔回吐,今早低見0.142元差不多接近10日線。或者有人質疑阿Man點解對此股咁大信心,本月10日公司曾發通告,指王平女士行使33億股優先股成大股東,通告未見行使價。有缸邊友竟然亂咁吹水話行使價唔使一粒神,心水清者睇睇資料,集團喺2010年以每股0.21元配售37.76億優先股,10日通告亦指集團仍有4.7億股優先股未被行使,啱啱條數夾埋就係呢37.7億股。即係大股東成本價0.21元,即係呢個價樓下買仲平過大股東,斷估大股東唔係有搞作,唔會無啦啦拎6億幾去行使批優先股,只要明白呢一點,就算追咗貴貨咪坐定定等睇戲囉!當然短炒者要自己執生,炒得股仔唔單止食暈浪丸,食埋驚風散至好入場。

麥狄文

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。