|
熱門:

2015年3月20日 即巿股評 港股直擊

【盤房來料】中國礦業超級大製作莫畏高

QQ騰訊(00700)今朝一度高見148.8元再創新高,曾帶動指數高24500點,不過大市短短幾日急彈近800點,喺冇特別利好消息下,24500點又要抖一抖氣。

阿里影業(01060)大製作完成,目前喺2.7至2.9元之間整固,市場轉炒同系阿里健康(00241),同樣經過長時間喺5元橫行收集,尋日升破6元阻力今日坐火箭。阿Man記得阿里健康喺7元至8元蟹貨都唔少,急升至近7元水平高追有風險。

今朝股仔人氣唔多夠,炒鬼去晒玩重磅股窩輪,平保(02318)輪同QQ輪最受歡迎。如果大家已喺阿Man推介嘅大製作阿里影業(01060)搵到餐飯,咁阿Man嚟緊要送上超級大製作中國礦業(00340),亦係今日升幅冠軍。咪睇中國礦業股價升咗四成就畏高,今日下半場隨時見埋毫半子樓上。大製作趙薇講緊係升一個開,咁超級大製作就肯定唔止翻一番。噚日公司聽牌,阿Man收到風有大戶求貨,而且開下盤口話兩毫樓下幾多貨都要,完全係大大殺起話之你咁款。公司今日復牌公布盈喜之餘,表示有意收購,至於係乜嘢項目,暫時未有頭緒。記得中國礦業對上一次超級大製作係2007年,三粒神樓下起步炒到上2.5元,經過接近八年收集,今次呢鋪肯定有幾大玩幾大。聽聞今次同樣由強國人主理,強國人炒股有幾狠,阿Man唔使多講,中國礦業有幾超級大作,不解釋,你懂的!

麥狄文

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。