|
熱門:

2015年3月6日 即巿股評 港股直擊

【盤房來料】阿里影業絕對係大製作

大市反彈乏力,早段更下試低位24100點水平,正如阿Man所料23800至24000點係街貨牛仔重貨區,大戶又點會放過班「牧牛人」。大市腳軟冇睇頭,不過炒鬼大把股仔炒,股王漢能(00566)超買得過份要抖抖,君陽(00397)接力繼續炒上,勝在夠輕身啱晒炒鬼嘴形。不過君陽上到0.405元回頭,皆因四粒神上面係重貨區,即使要再炒上,喺0.35元至0.4元之間仍需要時間收集,見好就收呢啲位無謂再博。

錯過咗君陽建議吼番同屬大國手系列嘅康健國際(03886),成功引入中國人壽(02628)母公司做大股東後,股價一度高見3.16元,股價緩緩調整至10日線之下,並於20日線找到支持,今日重上10日線即2.7元水平,調整似告一段落。老實講康健暫時未見鑊氣,只係成交逐步回升,不過勝在貨乾,一旦指揮官吹雞,一眾炒鬼入場,隨時再創新高。

炒即市要睇實阿里影業(01060),再升2.9%半場報收2.13元,升越噚日高位。阿里影業經過接近一年收集,仲要升穿2元相信直路望空全無蟹貨阻礙升勢,要重返公布當日開市價2.5元話咁易。阿Man認為趙薇夫婦入股價1.6元有一定啟示性,億億聲入股又點會貪一兩成升幅,阿Man夠膽講阿里影業絕對係大製作,以趙薇入股價1.6元計,至少升番一個開,咁啱公布阿里巴巴入股當日高位3.39元,現價買入仲有大把水位。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。