隔晚聯儲局議息，一如預期加息四分一厘，主席鮑威爾重申會續加息，更不會在今年內減息，市場揸住考慮未來加息「空間」，而唔喺會議時使用的「步伐」，市場認為喺聯儲局放鴿，道指急跌後倒升，美滙穿101，美長債下跌，長債下跌利好科網股，納指100指數飆2.2%。
本欄一向睇淡，原因是美國樓市向下、PMI下滑、晶片廠商睇淡前景及孳息率曲線倒掛，但似乎市場依然不理，過往曾說過一旦標普五百指數升穿4150點，任何淡倉都應該要止蝕，隔晚驚險地標指一度升至4148，即只差兩點便觸及止蝕，最終收造4119。
短線或好長仍淡
話雖如此，一旦今晚升穿4150，各戰友必需要止蝕，原因是勢在好友方，一旦升穿後，美股便會闖向8月16日高位4325，尤其納指Meta季績後，盤後狂升兩成，亞馬遜及蘋果今晚放榜，或會重演Meta故仔多一次。
不過，熊市故事未完，始終實體經濟面轉曳，萬一不幸升穿4150觸及止蝕，但升到去42XX後，掉頭跌穿番50(現處3949)至200天線(現處3952)交界，美股會再往下跌，屆時會重新再開淡倉。
至於觸發美股下跌，或是下次CPI數據，公布日期為情人節2月14日，上次CPI及核心CPI按年升6.5%及5.7%，再對一個月(去年11月)分別為7.1和6%，去年10月為7.7%和6.3%，去年9月則為8.2%和6.6%，若果2月14日公布的核心CPI反彈或跌幅少個0.3個百分點，市場便會認為核心通脹黏性高，加息時間會比原先市場估計長，股市會再有下跌壓力。
美發夢股或發圍
經過昨晚議息後，短期來講美股或會再度興奮，尤其Chatgpt熱潮踢起一眾發夢股，一堆未升摸咗底的發夢股或可短炒，包括Utility(U)、CrowdStrike(CRWD)、OKTA(OKTA)、Datadog(DDOG)、Cloudflare(NET)、SentinelOne(S)、ZoomInfo(ZI)，但以買入價失守一成止蝕，目標睇升兩成，同時以訂下在2月14日CPI公布前一兩日無論賺或蝕都要沽出呢堆發夢股。
總結長線睇淡不變，因為衰退風險仍大，只是時間上或比之前預期較後，但短線氣氛或進一步亢奮，短炒發夢股。
編按:作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周五在「信報網站」及「港股360」撰文。
