中美上周審計達協議，一度挾高港股，牛友大聲疾呼牛市重臨，結果又喺嘥氣，恒指依舊升唔穿條下降軌，目前被困在19189至20283水平。
市場好多聲音依然相信港股平到有今生無來世，但本欄重申一點，看過往市盈率意義不大，因今年內地受疫情影響，好多企業盈利大縮水，估值唔喺大家想像中咁平。
港股估值與台韓德相近
要睇估值，當然喺睇預期，目前恒指預期市盈率10.2倍，對比過往平均12.5倍喺算平(圖一)，但泊埋全球估值，目前恒指比日本及美股標指低，但與台灣、韓國及德國相約，但比法國及英國高(圖二)，即是頂多與台灣、韓國及德國股市同步。
再者，恒指預期市帳率目前是1.06倍，雖然貼近BOOK VALUE，但恒指預期股本回報率(ROE)已大縮水，由2006年最高的21.2%，接近腰斬一半至11.4%，估值往下壓(無論PE或PB)絶對合理，若果外圍尤其歐洲第四季出現重大危機，拖冧全球股市，恒指預期PB壓到0.95倍附近，即穿萬八，其實絶對有可能。
港股點行便要睇外圍，所謂睇外圍咪即喺睇美股。隔晚美國PMI粒數達51.5，好過預期的51.3，三大指數急挫後喘穩，標指與道指更止跌回升。
PMI好過預期，以至今晚公布非農若果都喺靚仔，不排除美股短期會挾淡倉，但問題是而家市場驚加息加幾多，當下重點不是9月加四分三厘，而是年底息率會加到去邊，一個月前市場認為加到三厘半機會最高，但一個月後的今日，市場落注加息到四厘機會最大，即喺相差半厘。
實際息率踢高不利美股
由於加息預期比原先差距大，十年實際債息(圖三)立即踢高，引發近期美股急挫，以目前標指預期市盈率17.5倍，略高過平均(17.3倍)，在實際利率持續攀升下，此估值好難站得住腳，一如過往本欄推測，標指會掟至負一標準差，即大約3200點水平。
其實從間尺圖表趨勢線量度，美股標指也出現類似走勢，標指約在4300點見頂，按目前估計，會跌向下面黃色趨勢線，即大約3400點水平(圖四)，更深可踩至下方紅色趨勢線附近，即3300左右。
因此，美股應該要盡快撤離，手上已揸淡倉的朋友，目前無需離場，止賺為在4100點，下方最少睇6月份低位3636。
編按:作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周三、五在「信報網站」及「港股360」撰文。
