突然市況由上周開始急轉直下，本欄美股倉更由綠轉紅，意味今年開始輸錢，但2020年實在豐收，全年大膁1.2倍，計及去年，本年暫嘔番近8%出來，也實屬正常。
聯儲局擺明砌冧股市
口講屬正常只是安慰自己，明顯上周錯判形勢，尤其賭輸咗聯儲局主席鮑威爾無宣布買長債壓低債息，當然就要接受市場懲罰。
睇番今年美股表現，也難怪鮑威爾無出手買長債救股市，以標普及納指今年高位3950及14175計，兩個股市從高位回調2.7%和8.9%，按年計，兩個指數更升2.3%和0.25%，更何況去年標普及納指全年升16.3%和43.6%，從聯儲局角度睇，股市何災之有，根本是無需要呢刻去救，即喺市場諗多咗(包括筆者)！
明顯呢局市場輸咗比聯儲局，不單鮑威爾無講砌低債息，連聖路易斯聯儲銀行總裁布拉德(James Bullard)上周五也表示目前債市還未至於無序，即喺儲儲局一錘定音要砌冧個市。
從市場其他指標觀察，大市愈來愈唔對路，貨幣基金資產回升(圖一)、美滙指數企硬在92附近(圖二)、十年美債撳唔番去1.4厘(圖三)，上述通通都是風險胃納收縮的利淡現象。
泊大巴揸現金
既然聯儲局要短期炸散大市，作為投資者千祈唔好逆水而行，加上美股倉綠轉紅，唯一打法就喺學摩連奴，打防守泊大巴，即喺減持揸Cash，為何又唔揸逆向ETF，原因喺向下急跌之中，市況會突然急彈，手腳慢好易夾到出血。
目前美股假倉持股最大佔比，正正是現金，佔組合比例90.75%(圖四)，論股份計，最大持股為Freeport McMoRan(FCX)，但倉位僅佔1.07%，而組合內仍持有的股票，是中線睇好，但又唔想全揸現金，尤其有部署下，會令筆者更對持有的股份及市況更加敏感。
港股倉情況亦一樣，持有現金佔組合近九成(圖五)，最大持股為紫金(02899)，組合內有中移動(00941)及聯通(00762)，目標是希望下跌速度會比大市慢。
整體來講，聯儲局一日唔出手撳低債息，全球股市勢必下墜，直到聯儲局按捺不住出手救市，跌市才會結束，尤其恒指與道指，在聯儲局未救市前，上述兩個指數或會出現去年3月墜情況。
不過，現時根本無需怯，因為正是彎道超車的時機，正如本欄去年美股回報可創逾倍升幅，正正是在大跌市時做好防守，當市場最淆底時，就喺起身出來打獵好時機。
作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周一、三在「信報網站」及「港股360」撰文。
（編者按：信報分析團隊羅崇博、尹德政、陳鎮強最新著作《勢在必行：活用全方位價值趨勢信號》現已發售）
歡迎訂購實體書 電子書：https://bit.ly/ejbook141
