熱門:

2019年7月26日 國際財經 即巿股評

【環宇搜股】炒半新股吼瑞幸咖啡

隔晚歐洲央行扮鷹,唔肯減四分一厘,好友噓聲四起,歐洲股市即由升轉跌,但行長德拉吉呵番市場,暗示未來將減息且有可能啟動量化寬鬆政策,投資者條氣先至順番,歐洲收市普遍較日中低位大幅收窄,美股道指則一度大跌207點後,收市只跌128點。

美GDP左右息口去向

除咗中美貿易談判外,大家都睇實下周議息,利率期貨估減四分一及減半厘機會分別為82.5%及17.5%,不過今晚香港時間八點半花旗國將會公布第二季GDP,市場估計增長只有1.8%,一旦低過此數,市場又會再番兜劈半厘。

閣下如果只喺玩港股,由6月下旬開始到呢刻,恒指依舊在兩萬八至兩萬九橫行,大市波幅窄到無倫,日日等四點收工,大戶散戶都呻無癮。不過,港股不代表投資市場的全部,全球央行擺明車馬亂咁嚟,有水位減息就派息,無息減就狂印,撇除港股,外面世界仍美麗!

例如美股標普500指數凌波微步破頂,昨日德拉吉暗示將量寬,非洲垃圾債連七厘都質穿,買咗已經賺價又食息。仲有喺歐豬國的希臘,若狠心夠勇做清兵,去年底夠掃巴克萊希臘債指數,截至昨日升幅高達23.5%,跑贏同期只升19.8%的標普500指數。

中銀租賃息率吸引

恒指廢,好彩部分個股唔曳,本欄核心例牌的粵海投資(00270)、蒙牛(02319)及現代牧業(01117)外,可留意埋中銀航空租賃(02588),因為租飛機業務穩定,預期市盈率亦只得8.4倍,估值唔高,預測股息率又有4.4厘,遠比十年美債高,今日曾創上市高後轉跌,現價買入目標睇85蚊,穿100天線(64.65元止蝕)。

美股方面,亞馬遜業績差過預期,上季每股盈利只得5.22美元,低過分析員估計的6.3%,盤後跌1.6%,但查實業績唔喺MISS 咁多,回調反而是吸納良機。至於GOOGLE母公司Alphabet,受惠雲計算及廣告收入佳,每股盈利達14.21美元,比市場估計高25.7%,盤後股價飆8%,中長線仍值得揸住。

要留意瑞幸仍蝕錢

嫌亞馬遜及Alphabet悶,高風險選擇可以諗下隻半新股瑞幸咖啡(LK),一來美國半新股再度當炒(Beyond Meat及CrowdStrike又再創新高),瑞幸亦食正內需潮流(為國內第二大咖啡連鎖品牌),兼且又有大數據概念(透過大數據做銷售),唯一最大缺點是仍蝕錢。

走勢上,瑞幸最近企在23美元阻力上,一旦升穿25.96美元上市高位就可飛天,以買入價跌穿一成止蝕,上望30美元。

編按:作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周三、五在「信報網站」及「港股360」撰文,另每逢周二在《信報》撰寫「政觀其辯」。

[email protected]

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads