隔晚淡友被兩粒震撼彈炸散!先有歐洲央行行長德拉吉(Mario Draghi)突然大放白鴿,緊接大美國主義的美國總統特朗普,與國家主席習近平通電話交談,更拍板在G20會面,全球股市隨即挾升,後市就要望實今晚聯儲局議息,但距離G20會議只得十日,特朗普再反枱機會甚微,短期股市仍屬安全期。
特朗普民調落後拜登
特朗普突然態度掟個大彎,有分析認為與侵侵正式宣布競逐連任有關。根據霍士新聞民意調查,如果呢刻美國總統大選,支持特朗普冧莊只有39%,民主黨熱門侯選人,前副總統拜登(Joe Biden)支持度就有49%,即放甩特朗普十個百分點,侵侵選舉工程一開波就宣布Mayday(Mayday是國際通用的無線電通話遇難求救訊號),唔淆底做嘢才怪!
上日美股全面爆升,晶片股更跑出,主要是大家認為中美兩國可講掂數,同時憧憬特朗普會放生華為,費城半導體指數隔晚即勁彈4.3%。半導體為中美貿易戰最大的戰場,由於市場氣氛大逆轉,費城半導體指數有權彈得更高更遠。
晶片股大暴發外,更癲當然要數人造肉的Beyond Meat,隔晚更一度升穿200美元大關,最高見過201.88美元,按日飆升18.8%,更比個半月前招股價25美元,喪升7.1倍,但地球卻有地深吸力,最終收造169.89美元,轉跌0.04%。
Beyond Meat概念多多,連黃維基的網購超市都揾到,一件8安士賣69.9港銀,但市場同類產品選擇多,競爭其實唔細,現價位掃Beyond Meat就好有保留。
巴西支付寶星光熠熠
反而可留意巴西版支付寶StoneCo(上市編號STNE),該股不單止獲股神旗艦巴郡及阿里同系公司螞蟻金服上市前入股,現分別持有9.8%和2.9%股權,連挪威央行(Norges Bank)也揸住0.6%。
作為科網股,StoneCo算是罕有錄得盈利的股份,集團首季純利大升6倍至1.86億巴西雷亞爾,收入增長86%至5.36億巴西雷亞爾,活躍客戶達31萬戶,年增92.7%,淨上客戶按季增4萬戶。
盤數省鏡吸引到高盛注意,最近該行首予StoneCo「買入」評級,估計每股盈利增長到2021年每年將有逾六成增長,更認為市場對行業減價戰過份擔心,現時估值未反映,目標睇37美元,比昨日收市價29.95美元,有23.5%。
從圖表睇到,StoneCo股價已重上50天線(28.49美元),更正在回補4月18日29.6至33.96美元的大裂口(當時因巴西銀行Itau Unibanco加快接受當地中小企信用卡付款引發大瀉),明顯動力正在轉強,現價買入,以28美元作止蝕,一旦成功補回大裂口,目標睇39美元。
編按:作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周三、五在「信報網站」及「港股360」撰文,另每逢周二在《信報》撰寫「政觀其辯」。