周四晚聯儲局一如預期維持息率不變,重點响主席鮑威爾講乜,佢老哥強調通脹轉弱僅屬暫時情況,市場演繹減息憧憬幻滅,美股連跌兩日,標指隔晚一度跌穿廿天線(2910點),最終跌0.2%,收2917。
睇番鮑威爾意思,佢解釋通脹轉弱僅屬暫時情況,並強調利率未來可能上調也可能下調,即喺球評家黃興桂話齋,又喺射十二碼理論,即一係入,一係唔入,鮑威爾其實喺講咗等於無講,只是淡友在五窮月借題發輝。
Alphabet落難值得吼
美企季度續放榜,感覺上勝預期比差過預期多,暫時與市場落差最大喺GOOGLE母公司Alphabet,因佔營業額85%的廣告業務,首季增長只有15%,創2015年以來最低,連帶歐盟17億美元反競爭罰款,連累Alphabet上季純利按年大跌29%至67億美元,累Alphabet股價從周一高位1296.97美元急墜,累挫近一成。
Alphabet元氣大傷,短期股價難免陷弱勢,但集團前景仍亮麗,尤其自動駕駛、雲業務、數據中心、AI等等,正如騰訊(00700)一樣,多個業務仍未變現,而Alphabet執行力更比軟銀強,是次大幅回調,喺長線持有的買入機會!
百勝中國食正消費大肥肉
季績公布後另一間值得留意的公司是百勝中國,上市代號YUMC,百勝中國由美國上市公司百勝分拆出來的中國業務(百勝則由百事分拆),百勝中國响內地經營多國知名品牌,包括肯德基及Pizza Hut,還有曾經响香港上市的小肥羊。
百勝中國上季經營溢利倒退23%至3億美元,表面上好曳,其實純粹技術因素,因受新面計準則影響,但經調整每股盈利其實升18%至59美仙,季績最大賣點是Pizza Hut業務終於有起色,同店銷售增長終於重回正軌,按年升1%,扭轉過呈負數的敗局。
靚女多人追是常識吧,仲要食正內地消費大肥肉,百勝中國唔憂嫁,去年拒絕高瓴資本及KKR組成的財團提出每股46美元私有化計劃,更於季績公布後當日升穿私有化價,明顯前途無限。
不過,受美股連跌兩日影響,百勝中國最近三日股價勁CHOK,周三晚一度挫4.3%後,隔晚回升兼且盤中創上市新高,現價小注買入,中線望64美元,跌穿50天線(現處43.39美元)才需執行止蝕。
編按:作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周三、五在「信報網站」及「港股360」撰文,另每逢周二在《信報》撰寫「政觀其辯」。